راولپنڈی: سکیورٹی فورسز نے خیبر پختونخوا کے ضلع خیبر میں انٹیلیجنس بیسڈ پرآپریشن کے دوران پانچ دہشتگردوں کو ہلاک کر دیا۔
فوج کے شعبہ تعلقات عامہ (آئی ایس پی آ) کے مطابق ہلاک دہشتگرد سکیورٹی فورسز پر حملوں اور بے گناہ شہریوں کے قتل میں ملوث تھے، آپریشن کے دوران شر پسندوں سے ہتھیار، گولیاں اور دھماکا خیز مواد برآمد ہوا۔
آئی ایس پی آر نے کہا کہ علاقے میں ممکنہ دہشتگردوں کے خاتمے کیلیے کلیئرنس آپریشن جاری رہا، سکیورٹی فورسز دہشگردی کے خاتمے کیلیے پُرعزم ہیں۔
چند روز قبل سکیورٹی فورسز نے لکی مروت میں آپریشن کے دوران 11 دہشتگردوں کو ہلاک کیا تھا۔ اس آپریشن سے دو روز قبل لکی مروت میں سکیورٹی فورسز کی گاڑی آئی ای ڈی سے ٹکرا گئی تھی جس کے نتیجے میں کیپٹن سمیت 7 جوان شہید ہوگئے تھے۔
آئی ای ڈی دھماکے میں شہید ہونے والوں میں کیپٹن محمد فراز، صوبیدار میجر محمد نذیر، لانس نائیک محمد انور، لانس نائیک حسین علی، سپاہی اسداللہ، سپاہی منظور حسین اور سپاہی راشد محمود شامل تھے۔
