کراچی: وزیر اعظم عمران خان کا کراچی کے شہریوں کیلئے نیا سال کا تحفہ، ڈیڑھ ارب روپے کی لاگت سے جدید 50فائر ٹینڈراور2باؤزر کے ایم سی کے حوالے کردئیے گئے۔
تفصیلات کے مطابق وفاقی حکومت کی جانب سے کراچی کے لئے فائر ٹینڈرز اور باؤزر حوالگی کی تقریب ہوئی، تقریب میں گورنر سندھ عمران اسماعیل نے 50 فائرٹینڈرز اور 2 باوزر کے ایم سی کے حوالے کیے،جس کی شمولیت سے شعبہ فائربریگیڈ کو جدید خطوط پر استوار کرنے میں مدد ملے گی۔
اس موقع پر میڈیا سے گفتگو کرتے ہوئے گورنر سندھ عمران اسماعیل کا کہنا تھا کہ وزیر اعظم کا کراچی کے لیے ایک اور وعدہ پورا ہوا، فائرٹینڈرز اور باؤزرز وزیراعظم عمران خان کی جانب سے کراچی والوں کے لئے تحفہ ہیں، فائر ٹینڈر اور باؤذرز ایک ارب 46 کروڑ روپے کی لاگت سے خریدے گئے، اتنی بڑی تعداد میں کبھی فائر ٹینڈرز نہیں خریدے گئے۔
گورنر سندھ نے بتایا کہ نو صنعتی ایسوسی ایشنز کو بھی 2/2 فائر ٹینڈرز دیں گے، سیلانی اور چھیپا کو بھی فائر ٹینڈرز دیں گے، فائر ٹینڈرز کی تین سال وفاقی حکومت دیکھ بھال کرے گی، اس کے بعد جن اداروں کو ٹینڈرز سپرد کیے جائیں گے وہ دیکھ بھال کے ذمے دار ہوں گے۔
تقریب سے خطاب میں وفاقی وزیر امین الحق کا کہنا تھا کہ کراچی کے ساتھ وفاق نے جو وعدہ کیا وہ پورا کررہے ہیں، شہر کے ترقیاتی کاموں میں رخنہ اندازی برداشت نہیں ہوگی، ٹائم لائن کے ساتھ تمام منصوبے مکمل کیے جائیں گے، گرین لائن بس کیلئے ٹینڈر کردیا گیا ہے، منصوبے کیلئے بسیں جون 2021 تک پہنچ جائیں گی، جون2021 میں گرین لائن منصوبہ سرجانی ٹاؤن سے نمائش تک شروع ہوجائے گا۔
وفاقی وزیر منصوبہ بندی اسد عمر کا کہنا تھا کہ کراچی میں پہلی بار جولائی 2021 میں جدید ٹرانسپورٹ کا نظام چلتا ہوا نظر آئے گا، محمود آباد نالے سے تجاوزات ہٹانے کا کام این ڈی ایم اےاس ہفتے سےشروع کردے گی، پپری تک متبادل ریلوے لائن ڈالی جائے گی،
اسدعمر کا کہنا تھا کہ کراچی کے لوگوں کوکئی دہائیوں ان کا حق نہیں ملا، بلاول بھٹو 49 سال بعد بھی کہہ رہے ہیں ہمیں کام کیلئے وقت چاہیے، یہ وہ لوگ ہیں جو دو سال سےعمران خان سے پوچھ رہے تھے کہ کیا کیا۔
تقریب سے خطاب کرتے ہوئے علی زیدی نے کہا کہ پاکستان کی تاریخ کا سب سے بڑا جوائنٹ وینچر ہونے جا رہا ہے، جناح برج کے پی ٹی نے ستائیس سال پہلے بنا کر کراچی کو تحفہ دیا تھا، مراد علی شاہ سے درخواست ہے جناح برج کی مرمت کا کام کرائیں۔
