اسلام آباد: وزیراعظم عمران خان کا پاکستان کے پہلے وزیرِ اعظم لیاقت علی خان کے صاحبزادے اکبر علی خان کی بیماری اور مالی مشکلات سے متعلقہ رپورٹس کا نوٹس لیتے ہوئے گورنر سندھ کو اہم ہدایت جاری کردی۔
وزیراعظم ہاؤس کی جانب سے جاری اعلامیے میں بتایا گیا ہے کہ وزیراعظم عمران خان نے لیاقت علی خان کے صاحبزادے اکبر علی خان کی معاشی تنگ دستی اور بیماری سے متعلق رپورٹس پر نوٹس لیا۔
وزیرِ اعظم نے گورنر سندھ کو فوری طور پر متعلقہ خاندان سے رابطہ اور ملاقات کرنے کی ہدایت کی۔
وزیراعظم عمران خان نے ہدایت کی کہ اکبر علی خان کے علاج معالجے کے تمام انتظامات و اخراجات حکومت پاکستان کی جانب سے یقینی بنائے جائیں۔
ذرائع کے مطابق گورنر سندھ جلد لیاقت علی خان صاحب کے صاحبزادے سے اُن کے گھر پر جا کر ملاقات کریں گے اور انہیں وفاقی حکومت کے تعاون کی مکمل یقین دہانی کرائیں گے۔
