مانچسٹر: برطانوی حکومت نے یوکے پاسپورٹ کے حامل شہریوں کے لیے نیا ہدایت نامہ جاری کردیا۔
نمائندہ اے آر وائی نیوز کے مطابق یورپین یونین سے علیحدگی کے بعد حکومت نے برطانوی شہریوں کے لیے نیا ہدایت نامہ جاری کر دیا، جس کے مطابق سرخ پاسپورٹ کی میعاد کو محدود کردیا گیا ہے۔
حکومت کی جانب سے جاری ہدایت نامے میں بتایا گیا ہے کہ سرخ (ریڈ) پاسپورٹ کی میعاد دس سال سے زاہد نہیں ہوگی، جن پاسپورٹس پر دس سال سے زائد کا عرصہ درج ہو گا وہ اجراء کے دس سال پورے ہونے پر از خود ختم ہو جائیں گے۔
حکومت کے مطابق کئی پرانے سرخ پاسپورٹس پر دس سال سے زائد کی میعاد بھی لکھی گئی تھی، جو اب قابل قبول نہیں ہوگی اور اجرا کے بعد سے اُس کا دورانیہ شمار کیا جائے گا۔
حکومت کے مطابق یورپین یونین سے علیحدگی کے بعد برطانیہ میں اب سرخ کی بجائے بلیو رنگ کا پاسپورٹ جاری کیا جائے گا، پاسپورٹ آفس نے پاسپورٹ ہولڈرز کو سفر سے پہلے پرانے پاسپورٹ کی معیاد چیک کرنے کا ہدایت نامہ جاری کیا۔
پاسپورٹ آفس کی جانب سے جاری اعلامیے کے مطابق ملک سے باہر جانے والوں کے پاسپورٹس کی کم سے کم میعاد چھ ماہ لازمی ہونی چاہیے۔
