کراچی کے علاقے بہادر آباد دھوراجی میں ہونے والی 20 لاکھ کی ڈکیتی ڈرامہ نکلی۔
اے آر وائی نیوز کے مطابق کراچی کے علاقے بہادر آباد دھوراجی میں اسلحے کے زور پر 20 لاکھ روپے چھینے جانے کا دعویٰ کرنے والا شہری جھوٹا نکلا۔
ذرائع کے مطابق شہری نے پولیس کو کہا اسلحے کے زور پر اسے لوٹا گیا، سی سی ٹی وی فوٹیج نے شہری کے جھوٹ کا بھانڈا پھوڑ دیا۔
سی سی ٹی وی فوٹیج میں ایک لینڈ کروزر کو آتے دیکھا گیا، مبینہ ملزم لینڈ کروزر سے اترا اور شہری کی کار میں جاکر بیٹھا، گاڑی سے رقم کا تھیلا اٹھایا اور واپس لینڈ کروزر میں جا بیٹھا۔
ویڈیو میں دیکھا گیا کہ واردات کے وقت شہری کار میں تھا اور دروازہ بھی کھلا چھوڑ رکھا تھا، مبینہ ملزم نے نہ اسلحہ نکالا اور نہ شہری نے کوئی مزاحمت کی۔
پولیس کا کہنا ہے کہ فوٹیج میں اسلحے کے زور پر لٹنے کی کوئی شواہد موجود نہیں ہیں، مبینہ ڈکیتی کا واقعہ آج شام پیش آیا تھا۔
پولیس کا کہنا ہے کہ واقعے کی مزید تفتیش جاری ہے جلد حقائق منظرعام پر آجائیں گے۔
