کراچی: سندھ حکومت نے لیجنڈری اداکار عمر شریف کی خواہش کے مطابق تدفین کے انتظامات شروع کردیے۔
صوبائی وزیراطلاعات سعید غنی نے سماجی رابطے کی ویب سائٹ پر جاری بیان میں بتایا کہ عمرشریف کی خواہش کے مطابق ان کی تدفین کےانتظامات کئے جارہےہیں۔
انہوں نے بتایا کہ عمرشریف کی تدفین اُن کی خواہش کے مطابق عبداللہ شاہ غازیؒ کے مزار سے متصل قبرستان میں کی جائے گی۔
مرحوم عمر شریف کی خواہش کے مطابق انکی تدفین حضرت عبداللہ شاہ غازی قبرستان میں کرنے کے انتظامات سندھ حکومت کررہی ہے۔
— Senator Saeed Ghani (@SaeedGhani1) October 2, 2021
یاد رہے کہ جرمنی میں انتقال کر جانے والے معروف پاکستانی اداکار عمر شریف کی میت منگل کے روز کراچی پہنچنے کا امکان ہے، جرمنی سے اُن کی میت پیر کی رات روانہ کی جائے گی۔ جرمنی کے شہر نیوریمبرگ سےکراچی کافضائی فاصلہ8 گھنٹے ہے۔
اطلاع کے مطابق عمر شریف کی میت کو سرد خانے منتقل کردیا گیا ہے، عمرشریف کے بیٹے اور اہلیہ کراچی سے براہ راست امریکا روانہ ہوئے تھے، جو آج رات کو جرمنی پہنچیں گے۔
ذرائع کے مطابق اتوارکی تعطیل کے باعث ضروری کارروائی پیر کے روز مکمل کی جائےگی، میت لانےکیلئے کمرشل پروازیا ایئر ایمبولینس کا استعمال کیاجاسکتا ہے۔
اس ضمن میں سول ایوی ایشن کے ذرائع کا کہنا ہے کہ ’ایئرایمبولینس سے متعلق تحریری درخواست موصول نہیں ہوئی، درخواست موصول ہوئی تو طیارے یا ایئرایمبولینس کو جناح انٹرنیشنل ایئرپورٹ پر اترنے کی اجازت دی جائے گی۔