دبئی: متحدہ عرب امارات میں سیاحتی ویزے کے لیے شرائط مقرر کردی گئیں۔
عرب میڈیا کے مطابق متحدہ عرب امارات کی وفاقی اتھارٹی برائے شناخت و شہریت کی جانب سے سیاحتی ویزے کے لیے چار شرائط مقرر کی گئی ہیں۔
سیاحتی ویزا پانچ برس کے لیے جاری کیا جائے گا جس کے لیے بنیادی شرط چھ ماہ کا بینک اسٹیٹمنٹ پیش کرنا ہے، بینک اسٹیٹمنٹ میں کم از کم چار ہزار ڈالر یا اس کے مساوی رقم کی ٹرانزیکشن دکھائی گئی ہو۔
اماراتی جریدے کے مطابق بینک ٹرانزیکشن کے علاوہ میڈیکل انشورنس، پاسپورٹ کی کاپی اور کلر فوٹو فراہم کرنا ہوگی۔
اتھارٹی کا مزید کہنا تھا کہ سیاحتی ویزا پانچ برس کے لیے کارآمد ہوگا اور مذکورہ شرائط تمام قومیتوں کےلیے یکساں رکھی گئی ہیں۔
جاری کیے جانے والے سیاحتی ویزے سے متعدد بار امارات آیا جا سکتا ہے تاہم اس کے لیے شرط ہے کہ سال میں ایک قیام 90 دن سے زیادہ نہ ہو، وہ افراد جو اپنا قیام 90 دن سے زیادہ کرنا چاہتے ہیں انہیں چاہیے کہ وہ بعدازاں اس میں توسیع کرلیں جو 180 دن سے زائد نہیں ہوگی۔
پانچ برس کے لیے جاری ہونے والے ویزے کا حساب اس دن سے کیا جائے گا جب غیر ملکی امارات میں داخل ہوگا اس دن کے بعد سے پانچ برس کی مدت کا حساب کیا جائے گا۔
ویزے کے حصول کا طریقہ کار بتاتے ہوئے اتھارٹی کا کہنا تھا کہ درخواست گزار ویب سائٹ پر اپنے بارے میں مکمل معلومات فراہم کرے جن میں نام، والدہ کا نام، ٹیلی فون نمبر، پیشہ اور ای میل ایڈریس شامل ہیں جبکہ ناقص درخواست کو رد کرنے کا اختیار اتھارٹی کے پاس ہوگا۔
