بینک میں عوام کی جانب سے رکھوائے گئے سونے کے 59 کلو زیورات چوری ہوگئے، کچھ دنوں قبل خاموشی سے واردات انجام دی گئی۔
بھارتی ریاست کرناٹک کے ضلع وجیاپور میں ایک فلمی چوری کی واردات پیش آئی ہے، جہاں منگولی کے علاقہ میں واقع کینرا بینک کی ایک برانچ سے چور 59 کلو سونے کے زیورات لے اڑے جس کی کانوں کان کسی کو خبر نہ ہوئی۔
چوری کی یہ واردات کچھ دن قبل انجام دی گئی جس کی تفصیلات اب منظرِ عام پر آئی ہیں، وجیاپور کے ایس پی لکشمن بی نمبارگی نے میڈیا کو بتایا کہ یہ سونا بینک میں عوام کی جانب سے گروی رکھوایا گیا تھا۔
انھوں نے بتایا کہ عوام نے یہ سونا زیادہ تر قرضوں کے عوض رکھوایا تھا، بینک منیجر نے اس سلسلے میں 26 مئی کو پولیس میں باضابطہ شکایت درج کروائی۔
ایس پی نے واقعے کی تفصیل بتاتے ہوئے کہا کہ 23 مئی کی شام کو بینک کو تالا لگا کر بند کیا گیا تھا، جبکہ 24 اور 25 مئی کو (ہفتہ اور اتوار ہونے کے باعث) بینک بند تھا۔
26 مئی کی صبح جب ایک ملازم صفائی کے لیے بینک آیا، تو اس نے دیکھا کہ بینک کے شٹر کا تالا کٹا ہوا ہے جس پر فوراً پولیس کو اطلاع دی گئی، بینک حکام نے تصدیق کی ہے کہ مجموعی طور پر بینک سے چوری ہونے والے سونے کا وزن 59 کلو ہے۔
پولیس حکام نے معاملے کی فوری تحقیقات کے لیے 8 خصوصی ٹیمیں تشکیل دی ہیں۔ ابتدائی تحقیقات میں شبہ ظاہر کیا جا رہا ہے کہ چوری کی یہ واردات 24 اور 25 مئی کی درمیانی راتوں میں انجام دی گئی ہوگی۔
