ورجینیا: امریکی ریاست ورجینیا کے شہر ’نیوپورٹ نیوز‘ کے ایک اسکول میں ابتدائی کلاسوں کی ٹیچر کو 6 سالہ طالب علم نے گولی مار کر شدید زخمی کر دیا۔
امریکی میڈیا کے مطابق شہر نیوپورٹ نیوز کے حکام نے جمعہ کو بتایا کہ ورجینیا کے ایک ایلیمنٹری اسکول کی 30 سالہ ٹیچر کو ایک 6 سالہ لڑکے نے گولی مار دی ہے جس سے ان کی حالت تشویش ناک ہے، جب کہ طالب علم کو حراست میں لے لیا گیا ہے۔
سٹی حکام کا کہنا ہے کہ فائرنگ حادثاتی نہیں تھی، طالب علم نے فرسٹ گریڈ کے کلاس روم میں پہلے ٹیچر سے بحث شروع کی، اور پھر پستول نکالی اور ایک گولی چلا دی۔
یہ واقعہ نیوپورٹ نیوز میں واقع رِچنیک ایلیمنٹری اسکول میں پیش آیا، حکام نے بتایا کہ 6 سالہ بچہ حراست میں ہے۔ فائرنگ کے فوراً بعد اسے حراست میں لے لیا گیا، واقعے میں اور کوئی طالب علم یا عملہ زخمی نہیں ہوا۔
پولیس چیف اسٹیو ڈریو نے میڈیا کو بتایا کہ وہ بچے کے معاملے میں کامن ویلتھ اٹارنی اور کچھ دیگر اداروں کے ساتھ رابطے میں ہیں۔
پولیس چیف نے کہا کہ ٹیچر کی حالت میں آخری اطلاعات تک بہتری آئی ہے، دوسری طرف شہر کے نئے میئر فلپ جونز نے صحافیوں کو بتایا کہ یہ شہر کے لیے ایک سیاہ دن ہے۔
