اسلام آباد: سابق صدر اور آرمی چیف ضیا الحق کی قبر پر نعرے بازی کرنے پر پیپلزپارٹی کارکنان کے خلاف مقدمہ درج کرلیا گیا۔
اے آر وائی نیوز کے مطابق پیپلزپارٹی کے لانگ مارچ کے دوران پی پی کارکنان نے فیصل مسجد میں ضیا الحق کی قبر پر نعرے لگائے تھے جس کا مقدمہ مسلم لیگ ضیا کے سینئر نائب صدر کی مدعیت میں درج کیا گیا۔
اسلام آباد کے تھانہ مارگلہ پولیس نے مقدمے کے بعد باضابطہ طور پر کارروائی شروع کردی ہے۔
مقدمے کے متن کے مطابق پیپلزپارٹی کے کارکنوں نے شہید ضیا الحق کی قبر کی بے حرمتی کی ہے جس پر سابق صدر کے چاہنے والوں میں غم و غصہ پایا جاتا ہے۔
ذرائع کے مطابق مقدمے میں پی پی رہنما ملک واصف علی کھوکھر کو نامزد کیا گیا ہے۔
واضح رہے کہ گزشتہ دنوں بلاول بھٹو کے ترجمان ذوالفقار علی بدر نے ضیا الحق کی قبر پر جیالوں کی نعرے بازی پر مذمتی بیان جاری کیا تھا۔
ان کا کہنا تھا کہ ضیا الحق کی قبر پر نعرے بازی اخلاقی طور پر ایک نامناسب واقعہ تھا اور یہ نعرے بازی چند جیالوں کی جانب سے کی گئی جس کی مذمت کرتے ہیں۔
