مسلم لیگ ن کے رہنما کیپٹن (ر) صفدر کا کہنا ہے کہ آپ کابینہ کی بات کرتے ہیں زرداری کے لیے جان بھی حاضر ہے۔
اے آر وائی نیوز کے مطابق مسلم لیگ ن کی مرکزی نائب صدر مریم نواز کے شوہر کیپٹن (ر) صفدر اعوان کا کہنا ہے کہ علیم خان بڑے بھائی ہیں حمزہ شہباز چھوٹا بھائی ہے بات بھائیوں میں ہی ختم ہوجائے گی۔
ان کا کہنا تھا کہ حمزہ شہباز کا نام وزیراعلیٰ کے طور پر لوح محفوظ میں لکھ دیا گیا ہے۔
فواد چوہدری پر تنقید کرتے ہوئے انہوں نے کہا کہ ان کا دماغی توازن کھو چکے ہیں، صاف اور شفاف الیکشن کے لیے الیکشن کمیشن کے ساتھ کھڑے ہیں۔
ان کا کہنا تھا کہ جب بھی الیکشن ہوئے تو مسلم لیگ ن دو تہائی اکثریت سے جیتے گی۔
مزید پڑھیں: علیم خان کو تھپڑ پڑنے کے بیان پر حمزہ شہباز بول پڑے
مسلم لیگ (ن) کے رہنما حمزہ شہباز نے اپنے بیان میں کہا کہ ان کے اور علیم خان کے حوالے سے بے بنیاد اور جھوٹا پراپیگنڈا کیا گیا ہے، علیم خان بھائی اور سینئر سیاست دان ہیں، پنجاب میں واضح شکست دیکھ کر بے پر کی اُڑائی جا رہی ہیں۔
دوسری جانب عبدالعلیم خان کے ترجمان کہتے ہیں کہ جھوٹی خبریں اور پراپیگنڈا مہم چوہدری پرویز الہٰی کو شکست سے نہیں بچا سکتی، سوشل میڈیا پر ایسی بھونڈی حرکتوں سے پرویز الہیٰ کو کچھ حاصل نہیں ہوگا۔
ترجمان نے کہا کہ وفاق کے بعد پنجاب میں بھی ہار تسلیم کرلیں، ہم سب متحد ہیں، عبدالعلیم خان غیر مشروط طور پر اپوزیشن کا ساتھ دے رہے ہیں، حمزہ شہباز کو وزیر اعلیٰ بنائیں گے۔
