اسلام آباد : بھارتی جاسوس کلبھوشن یادیو کی گرفتاری کو سات سال مکمل ہوگئے ، کلبھوشن یادیو پاکستان میں دہشت گردی کا نیٹ ورک چلا رہا تھا۔
تفصیلات کے مطابق پاکستانی سیکورٹی فورسز نے سات سال پہلے بھارت کے حاضر سروس آفیسر کلبھوشن یادو کو رنگے ہاتھوں پکڑ کر عالمی سطح پر بھارتی دہشت گردی کو بےنقاب کیا۔
کلبھوشن حسین مبارک پٹیل کے نام سے پاکستان میں مقیم اور دہشت گری کا نیٹ ورک چلا رہا تھا اور بھارتی نیوی کے کمانڈر رینک کا حاضر سروس تھا۔
کلبھوشن دو ہزار تین سے بھارتی ایجنسی’’را‘‘کیلئےپاکستان میں دہشت گردانہ کارروائیوں میں ملوث تھا اور ایران میں جعلی پاسپورٹ پر داخلے کے بعد بلوچ علیحدگی پسندوں کا نیٹ ورک پروان چڑھایا۔
پاکستانی ایجنسیوں نے نوسال کی کوششوں کے بعد کلبھوشن کو کامیابی سے ٹریپ کیا۔
کلبھوشن یادیو نے اپنےبیان میں ’’را‘‘ کی طرف سے پاکستان میں دہشت گردی کااعتراف کیا اور بتایا ہمارا ہدف سی پیک گوادربندرگاہ اور بلوچستان میں علیحدگی پسند تحریک کو ہوا دینا تھا، ’’را‘‘ پاکستان میں انتشار پھیلانے اور معصوم پاکستانیوں کے خون بہانے میں ملوث تھی۔
ستمبر دو ہزار سولہ میں کلبھوشن کی پاکستان میں کارروائیوں پر مبنی ڈوزیئر اقوام متحدہ کے حوالے کیا گیا، بھارت نے کلبھوشن یادیو کو بھارتی شہری تسلیم کرنے سے ہی انکار کردیا تھا۔
دو ہزار سترہ میں جب پاکستان میں کلبھوشن کی سزائے موت کا اعلان ہوا توبھارت میں کھلبلی مچ گئی۔
بھارت کا کلبھوشن کا مقدمہ لڑنا پاکستان میں بھارت کی دہشت گردانہ کارروائیوں کا اعتراف ہے۔
حاضرسروس انٹیلی جنس افسر کا پاکستان میں گرفتار ہو جانا’’را‘‘ کا پاکستان میں دہشتگردی پھیلانے کا ثبوت ہے۔
ماضی میں سری لنکا،نیپال اورمیانماربھی بھارت پر دہشتگری کے الزامات لگاچکے، گیارہ جنوری دو ہزار تئیس کو میانمار نے بھارت میں موجود دہشت گردوں کے ٹریننگ کیمپ پر اسٹرائیک بھی کی تھی۔
سوال یہ اٹھتا ہے کہ کیا عالمی برادری بھارت کے ہمسایوں کی طرف سے اس کے خلاف دہشتگری کی شکایات پر کوئی ایکشن لے گی؟ کیا ہندو توا نظریہ کےتحت پنپتا ہندوستان دہشتگری کےذریعے خطے میں انتشارپھیلاکرعالمی امن کیلئےخطرہ نہیں بن رہا؟
