اسلام آباد: عمران خان کی جوڈیشل کمپلیکس میں پیشی پر توڑ پھوڑ کے معاملے کا تخمینہ پولیس نے لگالیا۔
اے آر وائی نیوز کے مطابق اسلام آباد پولیس نے نقصان کی ابتدائی رپورٹ تیار کرلی ہے جس میں بتایا گیا ہے کہ پیشی کے دوران ڈیڑھ کروڑ سے زائد مالیت کی گاڑیاں توڑی گئیں۔
پولیس کا کہنا ہے کہ سیکیورٹی پر مامور پولیس اہلکاروں کے کھانے کے لیے آٹھ لاکھ روپے خرچ ہوئے جبکہ سیکیورٹی کے لیے لائے گئے کنٹینر اسلام آباد پولیس کو 18 لاکھ روپے میں پڑے۔
ابتدائی رپورٹ کے مطابق فیصل آباد اور چکوال پولیس کی گاڑیوں پر پانچ لاکھ سے زائد اخراجات آئے، فیول کی مد میں پولیس نے دس لاکھ روپے خرچ کیے۔
مشتعل مظاہرین کو روکنے کے لیے سات لاکھ کے شیل استعمال کیے گئے جبکہ ان اخراجات میں زخمی پولیس اہلکاروں کے اخراجات شامل نہیں۔
واضح رہے کہ توشہ خانہ کیس میں گزشتہ دنوں عمران خان جوڈیشل کمپلیکس میں پیش ہوئے تھے جس پر عدالت نے ان کی ضمانت 30 مارچ تک منظور کرلی تھی۔
