لاہور میں بیٹی کو تنگ کرنے سے روکنے پر بااثر شخص نے ماں کو بہیمانہ تشدد کا نشانہ بنادیا۔
اے آر وائی نیوز کے مطابق لاہور کے تھانہ کاہنہ کی حدود سادھوکی گاؤں میں بااثر شخص نے بیٹی کو تنگ کرنے سے منع کرنے پر ماں کو بہیمانہ تشدد کا نشانہ بنایا۔
بااثر شخص کی خاتون پر تشدد کی فوٹیج منظر عام پر آگئی جس میں اسے گلی میں خاتون پر تشدد کرتے دیکھا گیا۔
ذرائع کا بتانا ہے کہ بہیمانہ تشدد سے خاتون کے سر اور ہاتھ پر زخم آئے ہیں۔
خاتون کا تعلق ملتان سے بتایا گیا ہے جبکہ وہ لاہور میں گھریلو ملازمہ کے طور پر کام کرتی ہیں۔
متاثرہ خاتون کی جانب سے تھانہ کاہنہ میں اندراج مقدمہ کی درخواست دائر کردی گئی تاہم پولیس نے درخواست کے باوجود تاحال مقدمہ درج نہیں کیا ہے۔
ادھر دیالپور کے علاقے سبزی منڈی میں محمد احمد نامی بدبخت بیٹے نے مسجد میں اپنی عدالت لگائی اور والدہ کو بہیمانہ تشدد کا نشانہ بنایا، متاثرہ خاتون کو زخمی حالت میں اسپتال منتقل کردیا گیا۔
خاتون نے ضلعی پولیس آفیسر سے نوٹس لینے کی اپیل کی جس پر ڈی پی او حافظ خضر زمان نے نوٹس لیا اور ملزم کی گرفتاری کے احکامات جاری کیے۔
بعدازاں پولیس نے ملزم کو حراست میں لے کر قانونی کارروائی کا آغاز کردیا ہے۔
