شمالی وزیرستان: سیکیورٹی فورسز کے انٹیلی جنس بیسڈ آپریشن کے دوران میر علی حملے کے ماسٹر مائنڈ سمیت 8 دہشت گرد ہلاک ہوگئے۔
تفصیلات کے مطابق مسلح افواج کے شعبۂ تعلقاتِ عامہ (آئی ایس پی آر) کی جانب سے بیان میں کہا گیا ہے کہ سیکیورٹی فورسز نے شمالی وزیرستان میں انٹیلی جنس بیسڈ آپریشن کیا۔
آئی ایس پی آر کا کہنا تھا کہ آپریشن کے دوران فائرنگ کے شدید تبادلے میں 8 دہشت گرد مارے گئے، ہلاک دہشت گردوں میں انتہائی مطلوب کمانڈر صحراعرف جانان شامل ہیں۔
- Advertisement -
ترجمان نے بتایا کہ ہلاک دہشت گرد میر علی حملے میں ملوث تھے اور قانون نافذ کرنے والے اداروں کو بھی مطلوب تھے۔
آئی ایس پی آر نے کہا کہ علاقے میں ممکنہ دہشت گردوں کے خاتمے کیلئے کلیئرنس آپریشن جاری ہے ، سیکیورٹی فورسز دہشت گردی کے خاتمے کیلئے پُرعزم ہے۔
