ریڈیو پاکستان پشاور میں 9 اور 10 مئی کو ایک دل خراش واقعہ بھی پیش آیا تھا جب جان بچانے کے لیے ریڈیو عملے کے ایک ملازم نے تیسری منزل سے چھلانگ لگا دی۔
اسٹیشن ڈائریکٹر اعجاز خان نے افسوس ناک واقعے سے بتایا کہ ایک ملازم نے تیسری منزل سے چھلانگ لگائی، جو شدید زخمی ہو گیا، کور کمانڈر پشاور کی ہدایات پر زخمی کو سی ایم ایچ پشاور منتقل کیا گیا جہاں وہ زیر علاج ہے۔
اعجاز خان کے مطابق 9 مئی کی شام کو ایک سیاسی پارٹی کے ورکرز نے احتجاج کے دوران ریڈیو پاکستان کی دیوار کو تو ڑ دیا، شرپسندوں نے چاغی پہاڑ کے ماڈل کو بھی جلا کر راکھ کر دیا، یہ ماڈل اسلامی دنیا کے پہلے ایٹمی ملک ہونے کی علامت تھا۔
انھوں نے بتایا کہ شرپسندوں نے ریڈیو پاکستان پشاور کے استقبالیہ بلاک کو بھی آگ لگا دی، شرپسند سیکیورٹی اہلکاروں کے ہتھیار بھی چھین کر لے گئے، انھوں نے 350 سیٹوں والے خوب صورت آڈیٹوریم کو بھی جلا کر راکھ کر دیا۔
اعجاز خان کے مطابق ریڈیو پاکستان کی بلڈنگ ایڈم بلاک کے ساتھ ٹرانسمیشن آپریشن کی سہولیات کو بھی جلا کر خاکستر کیا گیا، ریڈیو پاکستان کے عملے کی جانب سے قرآن پاک کے واسطے دیے گئے، لیکن نادان لوگوں نے کسی کو خاطر میں نہ لاتے ہوئے سب کچھ راکھ کر ڈالا۔
انھوں نے مزید بتایا کہ مالی نقصان کا ازالہ تو ہو جائے گا مگر نادر نسخوں کے نقصان کی کمی کو پورا نہیں کیا جا سکتا، 9 اور 10 مئی حملوں کے باوجود 11 مئی کو ریڈیو پاکستان نے اپنی ٹرانسمیشن جاری رکھیں۔
