قومی ٹیم کے سابق کپتان انضمام الحق نے کہا ہے کہ 90 کی دہائی کے پلیئرز کو نکال دیا جائے توپاکستان کی کرکٹ ہلکی رہ جائےگی۔
حالیہ دنوں میں 90 کی دہائی کے کرکٹرز پر تنقید سامنے آنے کے بعد پاکستان کے سابق کپتان اور 90 کی دہائی کے سپراسٹار بیٹر انضمام الحق کا اس معاملے پر اظہار خیال کرتے ہوئے کہنا تھا کہ پاکستان کی کرکٹ سے 90 کی دہائی کے پلیئرز کو نکال دیا جائے توپاکستان کی کرکٹ ہلکی رہ جائےگی۔
سابق کپتان بابر اعظم سے متعلق سوال پر انضمام الحق نے کہا کہ بابراعظم بڑا پلیئر ہے، بیڈ پیچ سب پر آتا ہے، ٹیم میں بہت زیادہ تبدیلیوں کے بجائے بیٹھ کر سوچیں غلطی کہاں ہورہی ہے۔
ماضی میں پاکستان ٹیم کے چیف سیلکٹر کے عہدے پر بھی فائض رہنے والے انضمام الحق کا کہنا تھا کہ کچھ مہینوں سے پاکستان ٹیم اچھی کرکٹ نہیں کھیل رہی۔
انضمام نے کہا کہ تبدیلیاں ہوں گی تو کھلاڑیوں کو اعتماد نہیں ملے گا اور صورتحال یہی رہےگی، منیجمنٹ اور کھلاڑیوں پراعتماد کریں اور غلطیوں کا اندازہ لگائیں۔
سابق ٹیسٹ کرکٹر نے ٹیم میں تبدیلیوں کی نشاندہی کرتے ہوئے کہا کہ بار بار کوچز اور کھلاڑیوں کو تبدیل کرنے سے مسئلہ حل نہیں ہوگا۔
