کراچی: اسلام آباد ایئرپورٹ پر شارجہ جانے والے مسافر کے پیٹ سے 98 ہیروئن بھرے کیپسول برآمد ہو گئے، جب کہ علامہ اقبال ایئرپورٹ پر دوحہ جانے والے ایک مسافر کے پیٹ سے 89 آئس بھرے کیپسولز برآمد ہوئے۔
تفصیلات کے مطابق اینٹی نارکوٹکس فورس کی جانب سے منشیات کے خلاف کارروائیوں کا سلسلہ جاری ہے، اسلام آباد ایئر پورٹ پر شارجہ جانے والے ایک مسافر کو گرفتار کر لیا گیا ہے، جس کے پیٹ سے ہیروئن سے بھرے اٹھانوے کیپسول برآمد ہوئے ہیں۔
ترجمان اے این ایف کے مطابق علامہ اقبال ایئرپورٹ پر دوحہ جانے والے ایک مسافر کے پیٹ سے 89 آئس بھرے کیپسولز برآمد ہوئے، خیبر کے غیر آباد علاقے میں اسمگلنگ کی غرض سے چھپائی گئی 20 کلو چرس برآمد ہوئی۔
راوی موٹر وے ٹول پلازہ لاہور سے 2 ملزمان کو گرفتار کر کے ان کے قبضے سے 91 کلو چرس اور 28 کلو افیون برآمد کی گئی، بند بوسن روڈ ملتان کے قریب سے ملزم سے 4 پیکٹ افیون برآمد ہوئی۔ گرفتار ملزم کی نشان دہی پر اس کے گھر میں بنے خفیہ خانے سے مزید 8 پیکٹ افیون برآمد کی گئی۔
جتیک اسٹاپ کوئٹہ کے قریب سے ملزم سے 1 کلو 500 گرام چرس برآمد ہوئی، پاک افغان بارڈر چمن پر منشیات اسمگلنگ کی کوشش ناکام بنائی گئی، اور ملزم کو گرفتار کر کے اس کے قبضے سے 14400 نشہ آور گولیاں برآمد کی گئیں، گرفتار ملزمان کے خلاف انسداد منشیات ایکٹ کے تحت مقدمات درج کر کے ان کے خلاف مزید تحقیقات کا آغاز کر دیا گیا ہے۔
