اسلام آباد: جمعیت علمائے اسلام کے سربراہ مولانا فضل الرحمان نے ایم کیو ایم کے رہنما ڈاکٹر فاروق ستار کو ٹیلی فون کرکے استعفوں کے فیصلے کو واپس نہ لینے کے اعلان پر تشویش کا اظہار کرتے ہوئے کہا ہے کہ ایم کیو ایم اپنے فیصلے پر نظر ثانی کرے حکومت نے مکمل مینڈیٹ دیا ہے معاملے کو جلد بازی سے حل نہ کیا جائے۔
تفصیلات کے مطابق مولانا فضل الرحمان نے ایم کیو ایم کے رہنما ڈاکٹر فاروق ستار سے رابطہ کیا، ٹیلیفونک گفتگو میں مولانا فضل الرحمان نے فاروق ستار کو مشورہ دیا کہ ایم کیو ایم مذاکراتی عمل کو جاری رکھے، وزیرِاعظم سے اس حوالے سے بات چیت ہوئی ہے۔
اس موقع پر دڈاکٹر فاروق ستار نے کہا کہ حکومت ایم کیو ایم کے استعفے کے معاملے پر سنجیدہ نظر نہیں آرہی، وزیرِاعظم نے دورہ کراچی میں ایم کیو ایم کے استعفے کے معاملے کو نظر انداز کیا اگر وزیرِاعظم سنجیدہ ہوتے تو وہ ایم کیو ایم کو بلاتے اور ان کے تحفظات کو سنتے۔
ڈاکٹر فاروق ستار نے بتایا کہ ایم کیو ایم نے استعفے واپس نہ لینے کا اصول فیصلہ وزیر اعظم کے دورے کے بعد کیا ہے۔
جس پر مولانا فضل الرحمان نے فاروق ستار کو یقین دلایا ہے کہ وہ اس تمام معاملات پر وزیرِاعظم سے بات کریں گے اور ایم کیو ایم کے تحفظات کو ختم کرنے کے حوالے سے اپنا کردار ادا کرتے رہیں گے۔
