آئی سی سی نے ٹیسٹ کی نئی رینکنگ جاری کردی۔ پاکستانی مڈل آرڈر بیٹسمین یونس خان ایک درجہ تنزلی کے بعد دسویں نمبر پر چلے گئے ہیں۔ آئی سی سی نے پاکستان اور سری لنکا کے درمیان دبئی میں ہونے والے دوسرے ٹیسٹ کے نتیجے کے بعد رینکنگ جاری کی ہے۔ بیٹسمین رینکنگ میں جنوبی افریقہ کے اے بی ڈولئیرز بدستور پہلے نمبر پر موجود ہیں۔
پاکستانی کپتان مصباح الحق آٹھویں نمبر پر براجمان ہیں۔ یونس خان ایک درجہ تنزلی کے بعد دسویں نمبر پر چلے گئےہیں۔ سری لنکا کے مہیلا جے وردھنے سات درجہ بہتری کے بعد ٹاپ ٹوئنٹی بیٹسمینوں میں شامل ہوگئے۔
بولرز رینکنگ میں کوئی خاص تبدیلی نہیں ہوئی۔ جنوبی افریقہ کے ورنن فیلنڈر اور ڈیل اسٹین پہلے اور دوسرے نمبر پر موجود ہیں۔ سعید اجمل کی پانچویں پوزیشن برقرار ہے۔ ٹیم رینکنگ میں جنوبی افریقہ کا پہلا ، بھارت کا دوسرا اور پاکستان کا پانچواں نمبر ہے۔
