پاکپتن: حضرت بابا فرید گنج شکر کا 773 واں عرس جاری ہے، بہشتی دروازہ کھول دیا گیا جو 10 محرم کی رات تک کھلا رہے گا۔
حضرت بابا فرید گنج شکر کے عرس میں ملک بھر سے ہزاروں عقیدت مند شریک ہیں، دربار کے سجادہ نشین دیوان مودود مسعود چشتی نے نماز عشاء کے بعد بہشتی دروازہ کھولا، جس کے بعد زائرین میں قلاوے بھی تقسیم کئے۔
بہشتی دروازہ 10 محرم کی رات ایک سال کیلئے بند کر دیا جائے گا جبکہ نوری دروازے کو چہلم امام حسین تک بند رکھا جائے گا،عرس کے موقع پر سکیورٹی کے انتہائی سخت انتظامات کئے گئے ہیں۔ 60 سی سی ٹی وی کیمروں کے ذریعے مسلسل نگرانی کی جا رہی ہے جبکہ 1500 پولیس اہلکار ڈیوٹی سرانجام دے رہے ہیں۔
زائرین کے رش کی وجہ سے بدانتظامی بھی دیکھنے میں آئی،پولیس نے زائرین اور میڈیا پر لاٹھی چارج بھی کیا، جس کے بعد ڈی پی او نے میڈیا کو بہشتی دروازہ کھلنے کی کوریج سے روک دیا، پولیس بدانظامی کی وجہ سے حالات کنٹرول کرنے میں ناکام نظر آئی۔
