ریاض: یمن کی سرحد سے ملحقہ سعودی صوبے نجران میں ایک مسجد میں ہونے والے دھماکے کے نتیجے میں ایک شخص جاں بحق جبکہ 12 زخمی ہوگئے ہیں۔
سعودی نشریاتی ادارے الخبارایہ کے مطابق بم دھماکے میں مبینہ طور پر ملوث شخص زخمی ہے جبکہ ایک شخص جاں بحق اور 12 زخمی ہیں۔
سعودی عرب کی وزارت ِ داخلہ نے دھماکے کی تصدیق کرتے ہوئے کہا ہے کہ خود کش حملہ آور نے مسجد میں داخل ہوکرخود کو دھماکے سے اڑادیا۔
واضح رہے کہ نجران کی آدھی آبادی اسماعیلی شیعہ کمیونٹی پر مشتمل ہے تاہم تاحال حکومت کی جانب سے اس بات کی تصدیق نہیں کی گئی ہے کہ آیا یہ دھماکہ کسی شیعہ مسجد میں ہواہے یا اس کا تعلق اکثریتی سنی مسلک سے ہے۔
واضح رہے کہ گزشتہ ایک سال سے سعودی عرب کے مشرقی صوبے میں مقیم شیعہ مسلمانوں کو داعش کی جانب سے بم دھماکوں اور فائرنگ کے ذریعے قتل و غارت کا نشانہ بنایا جارہاہے۔
سعودی عرب میں اس حملے سے قبل آخری حملہ 16 اکتوبر کو قطیف میں ہوا جہاں عاشورہ محرم سے متعلق ایک مجلس میں ایک مسلح شخص نے فائرنگ کردی تھی جبکہ اس سے قبل بھی کئی مساجد میں دھماکے ہوچکے ہیں۔
