کراچی: سندھ کا 830 ارب روپے سے زائد مالیت کا بجٹ آج پیش کیا جائے گا،صوبائی کابینہ نے بجٹ تجاویز کی منظوری دے دی۔
سندھ کابینہ نے نئے مالی سال 2016-17ء کے لیے بجٹ کی منظوری دے دی، بجٹ آج پیش کیا جائے گا جس میں بجٹ میں تعلیم اورصحت کو خصوصی اہمیت دی گئی ہے۔
سندھ کابینہ کا اجلاس وزیراعلیٰ سید قائم علی شاہ کی زیر صدارت منعقد ہوا جس میں صوبائی وزیر خزانہ مراد علی شاہ نے ارکان اسمبلی کو نئےمالی سال کے بجٹ پر بریفنگ دی۔
دی گئی بریفنگ کے مطابق بجٹ میں 996 نئی اسکیمیں شامل کی گئی ہیں، سندھ حکومت کے اداروں نے ریکوری کا ہدف حاصل کرلیا تاہم زمینوں کی الاٹمنٹ پر پابندی سے بورڈ آف ریونیو ہدف حاصل نہ کرسکا۔
ارکان اسمبلی کو بتایا کہ بجٹ میں تعلیم اور صحت کے شعبہ جات کو خصوصی اہمیت دیتے ہوئے بھاری رقومات مختص کی گئی ہیں۔
ذرائع کا کہنا ہے کہ سندھ کا نئےمالی سال کا بجٹ 830 ارب روپے مالیت کا ہوگا، بجٹ میں کوئی نیا ٹیکس عائد نہیں کیا جارہا تاہم موجودہ محصولات کی شرح میں رود بدل کیا جائے گا، بجٹ میں کراچی کے لیے 10 ارب روپے کا خصوصی پیکیج رکھا گیا ہے جب کہ پانی کے منصوبے کے فور کے لیے چھ ارب روپے رکھنے کی تجویززیر غور ہے۔
