کراچی: سائٹ کے علاقے میں پولیس نے کارروائی کرتے ہوئےکالعدم تنظیم کے کارندوں سمیت 17 افراد کو حراست میں لے لیا، گرفتار افراد کے قبضے سے بھاری مقدار میں بارودی مواد بھی برآمد ہوا۔
پولیس حکام کے مطابق سائٹ پٹھان کالونی پولیس نے کارروائی کے دوران کالعدم تنظیم کے تین کارندوں کو گرفتار کیا، جن کی شناخت عصمت خالد اورعبد کے ناموں سے ہوئی، گرفتار ملزمان کے قبضے سے بارودی مواد، دستی بم اور اسلحہ بھی برآمد ہوا ہے۔
پولیس نے گرفتار افراد کو تھانے منتقل کر کے اُن سے تفتیش شروع کردی ہے، پولیس کے مطابق کالعدم تنظیم کے کارندے شہر میں دہشت گردی اور جرائم کی وارداتوں میں ملوث تھے۔
قبل ازیں ماڑی پور پولیس نے کارروائی کرتے ہوئے سانحہ بلدیہ میں ملوث رحمان بھولا کے قریبی ساتھی سمیت تین افراد کو گرفتار کیا، غلام علی کو زیرحراست ملزم بھولا کی نشاندہی پر گرفتار کیا گیا جس کا تعلق لندن کے عسکری ونگ سے ہے۔
