آپ نے مینیقن چیلنج کے بارے میں تو ضرور سنا ہوگا جس میں چند سیکنڈز کے لیے تمام افراد اپنی جگہوں پر بالکل ساکت ہوجاتے ہیں اور تھوڑی دیر بعد اپنی اصل حالت میں واپس آجاتے ہیں۔
آج کل ہر شخص اس چیلنج کو کرتا ہوا نظر آرہا ہے یہی وجہ ہے کہ اس کی مقبولیت زمین کی حدوں کو چیر کر خلا تک جا پہنچی اور خلا میں موجود خلا بازوں نے بھی یہ چیلنج کر دکھایا۔
خلا میں کشش ثقل کی عدم موجودگی کی وجہ سے بالکل ساکت رہنا ایک ناممکن عمل سمجھا جاتا ہے، لیکن عالمی خلائی اسٹیشن آئی ایس ایس کے خلابازوں نے اس ناممکن کام کو بھی کر دکھایا۔
آئی ایس ایس کے فیس بک صفحہ پر جاری کی جانے والی ویڈیو میں خلائی اسٹیشن پر موجود 5 خلابازوں کو بالکل ساکت دیکھا جاسکتا ہے۔
دراصل ان خلا بازوں نے کونوں پر سہارا لیا یا خود کو کسی شے کے ساتھ پھنسا لیا تاکہ وہ حرکت نہ کرسکیں، یوں بالکل ساکت ہو کر انہوں نے مینیقن چیلنج کو پورا کر ڈالا۔
آئی ایس ایس کے صفحہ کے مطابق اس طرح ان خلابازوں نے خلا میں نیا سال منایا۔
