ابوجا:نائجیریا کی فضائیہ نے ملک کے شمال مشرقی علاقےغلطی سے مہاجرین کے کیمپ پر بمباری کردی جس کے نتیجے میں 100 سے زائد مہاجرین ہلاک ہوگئے۔
تفصیلات کےمطابق نائجیرین فضائیہ کے جنگی طیارے نے کیمرون کی سرحد کے قریب ران کے شمال مشرقی علاقے میں غلطی سے بمباری کی۔جس کے نتیجے میں 100 سے زائد مہاجرین ہلاک جبکہ 200سے زائدافراد زخمی ہوگئے۔
ریڈ کراس کا کہنا ہے کہ نائجیرین فضائیہ کےاس حملے میں اس کے عملے کے چھ افراد بھی مارے گئے ہیں۔ریڈ کراس کے ترجمان جاسون کا کہنا تھا کہ متاثر ہونے والے رضاکار اس ٹیم کا حصہ تھےجو بےگھر25000 افراد کےلیے خوراک کی فراہمی کا کام سرانجام دے رہی تھی۔
نائجیریا کے صدر محمد بخاری نے سماجی رابطے کی ویب سائٹ ٹویٹر پر اپنے پیغام میں اس جانی نقصان پر اپنے دکھ کا اظہار کرتے ہوئے لوگوں سے صبر کی درخواست کی ہے۔
I sympathize with the families of the dead, and with the injured, and the Government and people of Borno State.
— Muhammadu Buhari (@MBuhari) January 17, 2017
فوج کے ترجمان میجر جنرل لکی ارابور نے کہا کہ جیٹ طیارے کے ہواباز نے غلطی سے سمجھ لیا کہ وہ جنگجوؤں کو نشانہ بنا رہا ہے۔انہوں نے کہا کہ انھیں اطلاع ملی تھی کہ اس علاقے میں بوکوحرام کے جنگجو جمع ہو رہے ہیں۔
نائجیریا کی فوج کے ترجمان جنرل رابع ابوبکر نے کہا کہ بوکوحرام کے کچھ بچے کھچے عناصر ران کے باہر دیکھے گئے تھے اور فوج نے انہیں ختم کرنے کے لیے کارروائی کی تھی۔
واضح رہے کہ نائجیریا میں گذشتہ 7 سال سے جاری لڑائی میں تقریبا 20000 افراد ہلاک ہوچکے ہیں جبکہ 26 لاکھ افراد بےگھر ہوئے ہیں۔