سری نگر: مقبوضہ کشمیر میں برفانی تودہ گرنے سے 10 سے زائد بھارتی فوجی ہلاک ہوگئے، 6 فوجیوں کو زندہ نکال لیا گیا، متعدد فوجی دبے ہونے کے سبب ہلاکتوں میں اضافے کا خدشہ ہے۔
برطانوی نشریاتی ادارے کے مطابق برفانی تودہ مقبوضہ کشمیر کے گریز سیکٹر میں گرا جس کے سبب متعدد بھارتی فوجی ہلاک ہوئے، اب تک 10 فوجیوں کی لاشیں نکالی جاچکی ہیں۔
بھارتی میڈیا کے مطابق لاشوں کی تعداد میں اضافے کا خدشہ ہے، امدادی کام جاری ہے۔
بھارتی فوج کے مطابق برفانی تودہ گرنے کے واقعات دو جگہ پیش آئے جس کی زد میں فوج کا ایک کیمپ اور ایک گشتی پارٹی آئے ہیں، خراب موسم کے باوجود فوراً امدادی کام شروع کر دیا گیا ہے۔
بھارتی فوج کا بیان ہے کہ تودے کی زد میں آنے والے کیمپ سے ایک جونیئر کمیشنڈ آفیسر اور 6 فوجیوں کو زندہ باہر نکال لیا گیا لیکن اس حادثے میں 3 فوجی ہلاک ہوگئے جن کی لاشیں جعمرات کی صبح برآمد ہوئیں۔
وزیر اعظم نریندر مودی نے اپنے ٹوئٹر پر جاری پیغام میں افسوس کا اظہار کرتے ہوئے کہا کہ انھوں نے فوج کے اہلکاروں کو تیزی سے امدادی کارروائی کا حکم دیا ہے۔
Deeply saddened at the death of our Veer jawans in an avalanche in Kashmir. Have directed the authorities for speedy search and rescue ops.
— Narendra Modi (@narendramodi) January 26, 2017
واضح رہے کہ ایک روز قبل بھی مقبوضہ کشمیر میں برف کا تودہ گرا تھا جس کی زد میں آکر بھارتی میجر ہلاک ہوگیا تھا، یہ واقعہ بھی اسی علاقے میں پیش آیا تھا۔
غیر ملکی میڈیا کے مطابق ہلاکتوں کی حتمی تعداد کا ابھی تعین کیا جارہا ہے۔
