کراچی : مشتعل شہریوں نے دو ڈاکو کو مارڈالا۔ واقعہ کورنگی میں پیش آیا،پولیس نے تاحال کوئی کارروائی نہیں کی۔
تفصیلات کے مطابق کراچی کے علاقے لانڈھی بابرمارکیٹ میں مقامی افراد نے ایک مبینہ ڈاکو کو پکڑ کر تشدد کا نشانہ بنایا اورپھر تیل چھڑک کرآگ لگادی، آگ کے شعلوں میں جھلستا ہوا ڈاکو موقع پر ہی چل بسا، اس دوران کسی نے بھی اس کو بچانے کی کوشش نہ کی۔
مقامی لوگوں کا کہنا ہے کہ زندہ جلایا گیا شخص لوٹ مار کرتے ہوئے رنگے ہاتھوں پکڑا گیا تھا، اس موقع پر پولیس جائے وقعہ پر بر وقت نہ پہنچ سکی، پولیس نے تا حال کوئی کارروائی نہیں کی۔
دوسری جانب کورنگی اللہ والا ٹاؤن میں کار سوار ایک شہری نے ڈاکو کو گولی مارکر ہلاک کردیا، مذکورہ ڈاکو کی شناخت عثمان کے نام سے ہوئی ہے۔
شہری کی فائرنگ سے ایک خاتون بھی زخمی ہوئی ہے جس کے قبضے سے دو پستول بھی ملے ہیں، پولیس کے مطابق زخمی خاتون پر ڈاکو کے ساتھی ہونے کا شبہ ہے۔
علاوہ ازیں حب ریور روڈ پر مبینہ پولیس مقابلے میں ایک ملزم مارا گیا۔ سائٹ سپر ہائی وے پر پولیس نے ٹارگٹ کلر نسیم الغنی کو گرفتار کرکے اسلحہ برآمد کرلیا۔
چاند بنگلہ گراؤنڈ گل گوٹھ میں بھی کارروائی کے دوران پولیس نے سیاسی جماعت سے تعلق رکھنے والے چار ٹارگٹ کلرز کو گرفتار کرلیا۔
