برطانوی شہزادی کیٹ مڈلٹن اپنی خوبصورتی اور فیشن کے باعث دنیا بھر میں مشہور ہیں۔ ان کا فیشن نہایت باوقار اور سادہ ہے جو دنیا بھر میں فیشن ٹرینڈز کی نئی ترجیحات طے کرتا ہے۔
اب شہزادی کے خاکوں پر مشتمل ایسی کلرنگ بک پیش کی گئی ہے جسے خریدنے والا ان کے لباسوں میں اپنی مرضی کے رنگ بھر سکتا ہے۔
کیٹ مڈلٹن کے خاکوں پر مشتمل یہ کتاب فلاحی مقاصد کے لیے جاری کی گئی ہے اور اس سے حاصل ہونے والی رقم برطانوی شاہی محل کے زیر انتظام چلنے والے فلاحی منصوبوں پر خرچ کی جائے گی۔
کتاب میں کیٹ مڈلٹن کی مختلف مواقعوں پر لی گئی 31 تصاویر کو خاکوں کی شکل میں پیش کیا گیا ہے۔ ان خاکوں میں شہزادی کہیں محو رقص ہیں، کہیں گھڑ سواری کر رہی ہیں، کہیں چائے سے لطف اندوز ہو رہی ہیں اور کہیں شہزادہ ولیم کے ساتھ کسی تقریب میں شریک ہیں۔
اس کتاب کی قیمت 6 ڈالر رکھی گئی ہے اور اس میں شہزادی کیٹ کے لباس کے علاوہ باقی تمام اشیا اپنے اصل رنگوں میں موجود ہیں۔
کیا آپ ایسی خوبصورت تصاویر میں رنگ بھرنا چاہیں گے؟
