برلن: جرمنی میں واقع امریکی ایئربیس پر غلطی سے موصول ہونے والے پیغام نے امریکی فوجیوں کی دوڑیں لگوا دیں۔
تفصیلات کے مطابق جرمنی میں واقع امریکی ایئربیس اسپینڈیلم پر ہائی الرٹ پیغام کی تیاری کاآزمائشی سلسلہ جا ری تھا جس کے دوران ہائی الرٹ کا ایک آزمائشی پیغام ایئر بیس میں موجود تمام ونگ کمانڈرز تک غلطی سے پہنچ گیا جس کے بعد ایئربیس پر کھلبلی مچ گئی۔
دراصل کسی ایمرجنسی سے پیشگی نمٹنے کے لیے پیغام رسانی کو موثر اور فوری بنانے کے لیے ریہرسل کے دوران غلطی سے ہائی الرٹ پیغام تمام کمانڈرز تک پہنچ گیا جس میں آگاہ کیا گیا تھا کہ دشمن نے ایئربیس کو تباہ کرنے کے لئے میزائل فائر کردیا ہے اس لئے فوری طور پر محفوظ ٹھکانوں میں چھپ جائیں۔
سرخ رنگ کا ہنگامی الرٹ ٹیپلیٹ میسج ملتے ہی تمام کمانڈرز چوکنا ہوگئے اور ایئر بیس پر موجود فوجیوں کی دوڑیں لگ گئیں جسے جو محفوظ مقام ملا وہاں چھپ گیا۔
تقاہم جلد ہی غلطی کا احساس ہوتے ہی فوری طور پر ایئربیس پر موجود کمانڈرز کو نیلے رنگ کا پیغام بھیجا گیا جس میں پرانے پیغام کی تصیح کرتے ہوئے کہا گیا کہ پچھلا پیغام غلطی سے آپ تک پہنچا جسے نظر انداز کرتے ہوئے اپنے معمول کا کام انجام دیتے رہیں۔
