کراچی : آئی جی سندھ اے ڈی خواجہ کی خدمات وفاق کے حوالے کر دی گئی ہیں اور ان کی جگہ اے آئی جی سندھ عبدالمجید دستی کو عارضی طور پر نیا آئی جی سندھ مقرر کردیا گیا ہے۔
تفصیلات کے مطابق آئی جی سندھ اے ڈی خواجہ کو عہدے سے فارغ کردیا گیا ہے اور انہیں وفاقی اسٹیبلشمنٹ ڈویژن اسلام آباد رپورٹ کرنے کی ہدایت کی گئی ہے جب کہ ان کی جگہ اے آئی جی سندھ عبدالمجید دستی کو عارضی آئی جی سندھ مقرر کردیا گیا ہے انہیں یہ چارج اضافی طور پر دیا گیا ہے۔
سندھ حکومت کی جانب سے جاری کردہ اعلامیہ کے مطابق اے ڈی خواجہ کو ان کے عہدے سے سبکدوش کر کے اے آئی جی عبد المجید دستی کو آئی جی سندھ کا اضافی اور عارضی چارج دیاگیا ہے۔
اسی سے متعلق : آئی جی سندھ اے ڈی خواجہ کو جبری رخصت پر بھیج دیا گیا
واضح رہے عبدالمجید دستی اس وقت بہ طور ایڈیشنل آئی جی پولیس سندھ (ریسرچ، ڈیولپمنٹ، انسپیکشن اینڈ انکوائری ڈویژن) میں خدمات انجام دے رہے ہیں تا ہم اب انہیں آئی جی سندھ کا اضافی اور عارضی چارج بھی دے دیا گیا ہے۔
دوسری جانب سندھ حکومت کی جانب سے وفاقی اسٹیبلشمنٹ ڈویژن کو بھیجے گئے مراسلے میں اے ڈی خواجہ کی جگہ نئے آئی جی سندھ کی تقرری کے لیے تین افسران کے نام تجویز کیے گئے تھے جس میں عبدالمجید دستی سمیت عبدالقادر تھیبواور خادم حسین بھٹی کے نام شامل تھے۔
ذرائع کا کہنا ہے کہ سندھ حکومت کا اے ڈی خواجہ کے ساتھ اختلافات کی خبریں گردش کرتی رہی ہیں اور چند ماہ قبل بھی انہیں جبری رخصت پر بھیج دیا گیا تا ہم وفاق کی مداخلت پر انہیں دوبارہ آئی جی سندھ کا چارج دے دیا گیا تھا۔
