واشنگٹن : امریکہ نےشامی حکومت کےخلاف کیمیائی حملے کے جواب میں شام پر60 ٹام ہاک کروزمیزائل داغے ہیں۔
تفصیلات کےمطابق امریکی محکمہ دفاع پینٹاگون کا کہنا ہےکہ مشرقی بحیرہ روم میں بحری بیڑے سے60 ٹام ہاک کروز میزائل سے شام کے ایک ہوائی اڈے کو نشانہ بنایا گیا ہے۔
غیرملکی خبر رساں ادارے کی رپورٹ کے مطابق وائٹ ہاؤس حکام کا کہناہے کہ ان میزائلوں کے ذریعے شام کے الشعیرات ایئربیس کو نشانہ بنایا گیاجہاں 4 اپریل کو مہلک گیس حملہ کیا گیا تھا۔
امریکی صدر ڈونلڈ ٹرمپ کاکہناہےکہ انہوں نےشام کی فضائی بیس پر حملے کا حکم دیا تھا جہاں سے منگل کو شامی فضائیہ نے حملے کیے تھے۔
ڈونلڈ ٹرمپ نے اس موقع پرتمام مہذب ممالک سے شام میں تنازع کو ختم کرنے میں مدد کرنے کی بھی اپیل کی ہے۔
خیال رہےکہ امریکہ اور اس کے مغربی اتحادیوں نے شام پر فضائی حملے کے دوران کیمیائی ہتھیار استعمال کرنے کا الزام عائد کیا ہےجس کی شامی حکومت نے تردید کی ہے۔
شام میں کیمیائی حملہ انسانیت کی توہین ہے،صدرٹرمپ
یاد رہےکہ 5 اپریل 2017 کووائٹ ہاؤس میں پریس کانفرنس کے دوران امریکی صدر ڈونلڈ ٹرمپ کا کہنا تھا کہ ادلب میں ہونے والے کیمیائی حملے میں 70 کے قریب افراد ہلاک ہوئے جن میں سے اکثریت بچوں کی تھی اور ایسا ہونا ’تمام حدود کی پامالی ہے‘۔
ڈونلڈ ٹرمپ کاکہناتھاکہ ’بشارالاسد کی حکومت کے ہولناک اقدامات کو برداشت نہیں کیا جاسکتا،امریکہ اپنے اتحادیوں کے ساتھ کھڑا ہے اور دنیا بھر میں ہونے والے ایسے حملوں کی مذمت کرتا رہے گا‘۔
دوسری جانب امریکی وزیرِ خارجہ ریکس ٹیلرسن کاکہنا تھا کہ شام کے مستقبل میں بشار الاسد کی کوئی جگہ نہیں ہے۔
شام میں کیمیائی حملے میں مرنے والوں کی تعداد 70 ہوگئی
واضح رہےکہ دو روز قبل شام کے شمال مغربی حصے میں واقع باغیوں کے زیر کنٹرول علاقے میں جنگی جہازوں کے ذریعے کیے گئے مبینہ مہلک گیس حملے میں متعدد بچوں سمیت 70 کے قریب افراد ہلاک ہوگئے تھے۔
