زمین میں بڑے بڑے گڑھے پڑ جانا ایک ایسا عمل ہے جو نہایت نقصان کا سبب بنتا ہے۔ اگر یہ کسی رہائشی مقام پر اچانک نمودار ہوجائیں تو گھروں کو گرا دیتے ہیں جن کے باعث لوگوں کی ہلاکت بھی واقع ہوسکتی ہے۔
لیکن کیا آپ جانتے ہیں زمین میں یہ گڑھے کیوں پڑتے ہیں؟
عام طور پر یہ ایک قدرتی جغرافیائی عمل سمجھا جاتا ہے لیکن یہ ایک غلط فہمی ہے۔ زمین پر یہ تباہ کن گڑھے ہم انسانوں کی وجہ سے نمودار ہوتے ہیں۔
دراصل ان کا سبب زمین کے اندر بچھائے جانے والے فراہمی آب یا سیوریج کے بڑے بڑے پائپ ہوتے ہیں۔
یہ پائپ بعض اوقات کہیں کہیں سے خستہ ہوجاتے ہیں جس کے بعد وہاں سے پانی لیک ہونے لگتا ہے۔
بعض اوقات یہ پائپ مکمل طور پر ٹوٹ کر 2 حصوں میں بھی تقسیم ہوجاتے ہیں جس کے بعد پانی کے ریلے زیر زمین بہنے لگتے ہیں۔
مزید پڑھیں: ہماری زمین کی گہرائی میں کیا ہے؟
یہ پانی اس مقام سے مٹی کو بہا دیتا ہے جس کے بعد آہستہ آہستہ وہ مقام کھوکھلا ہوتا جاتا ہے۔ یہ عمل کئی دن، مہینوں یا ہفتوں تک جاری رہ سکتا ہے۔
اس کے بعد ایک وقت ایسا آتا ہے کہ زمین کی اوپری سطح کے نیچے سے مٹی بالکل ختم ہوجاتی ہے اور زمین کی سطح زور دار طریقے سے ٹوٹ جاتی ہے جس سے اس وقت اس مقام پر موجود گاڑیاں یا افراد نیچے گڑھے میں آ گرتے ہیں۔
یہ عمل بھاری مالی و جانی نقصان کا باعث بن سکتا ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
