ایری زونا: امریکی ریاست ایری زونا میں سیلابی ریلے کی زد میں آکر بزرگ اور بچوں سمیت نو سیاح ہلاک ہوگئے اور چار زخمی ہیں ‘ جبکہ ایک بچہ تاحال لاپتہ ہے۔
تفصیلات کے مطابق یہ حادثہ امریکی ریاست ایری زونا سے ملحقہ ٹونٹو نیشنل فارسٹ میں پیش آیا جہاں اکثر لوگ ہائکنگ اور پکنک کی غر ض سےآتے ہیں ‘ ایسا ہی ایک گروپ سیلابی ریلے کی زد میں آگیا۔
متعلقہ کاؤنٹی کے شیرف نے امریکی میڈیا کو بتایا ہے کہ اس گروہ کا تعلق فیونکس اور فلیگ اسٹاف ایریاز سے ہے اور یہ ہفتے مشہورِ زمانہ سوئمنگ ہول کے قریب پکنک منا رہے تھے جو کہ وسطی ایری زونا میں واقع ہے۔
ان کا کہنا تھا کہ اوپر پہاڑوں میں شدید بارش ہوئی جس کے سبب نیچے آنے والا پانی سیلابی ریلے کی شکل اختیار کرگیا اور اپنے ساتھ پورے گروہ کو بہا لے گیا‘ تلاش کے لیے 40 ارکان پر مبنی ریسکیوٹیم زمین پر ان کی تلاش میں نکلی جبکہ فضا میں ہیلی کاپٹروں کے ذریعے سے بھی تلاش کا کام انجام دیا گیا۔
ٹیم کو تلاش کے دوران پانچ بچوں اور چار بڑوں کی نعشیں ملیں‘ حادثے میں ہلاک ہونے والوں میں 60 سالہ بزرگ خاتون سے لے کر 12 سال کی بچی بھی شامل ہیں۔ ریسکیو ٹیم نے مزید چار افراد کو زخمی حالت میں تلاش کر کے بینر اسپتال منتقل کردیا‘ تاہم ایک 13 سالہ لڑکے کی تلاش تاحال جاری ہے۔
اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔
