کراچی : اسٹیٹ بینک آئندہ دوماہ کیلئے شرح سود کا اعلان آج کرے گا، معاشی ماہرین کے مطابق شرح سود میں رد وبدل کا امکان نہیں ہے ۔
اسٹیٹ بینک کے مطابق مانیٹری پالیسی کمیٹی معاشی اعداد وشمار اور خاص طور افراط زر کا جائزہ لینے کے بعد رواں مالی سال کی پہلی مانیٹری پالیسی کا اعلان آج کرے گی، آئندہ دو ماہ کیلئے شرح سود کا اعلان نئےگورنر اسٹیٹ بینک آج پریس کانفرنس میں کریں گے۔
شرح سود میں ردوبدل کا امکان نہیں ہے۔
معاشی ماہرین کے مطابق افراط زر کی شرح میں ہوتی کمی کے باعث شرح سود میں اضافے کا امکان نہیں، جون میں افراط زر کی شرح تین اعشاریہ نوفیصد رہی۔
دوسری جانب بینکنگ سیکٹر کیجانب سے شرح سود میں اضافے کا مطالبہ دیکھنے میں آیا ہے، اس وقت بنیادی شرح سود پانچ اعشایہ سات پانچ فیصد ہے۔
واضح رہے کہ گزشتہ سال مئی میں آخری بار اسٹیٹ بینک نے شرح سود میں کمی کی تھی، اس وقت شرح سو د پانچ اعشاریہ سات پانچ فیصد ہے، جو ملکی تاریخ میں 42 سال کی کم ترین سطح ہے۔
