لاہور : چیئرمین پاکستان کرکٹ بورڈ نجم سیٹھی نے کہا ہے کہ سٹے باز کی جانب سے قومی کرکٹر کو پیشکش کا معاملہ آئی سی سی کے سامنے اُٹھا دیا ہے.
یہ بات چیئرمین پی سی بی نجم سیٹھی نے سماجی رابطے کی ویب سائٹ ٹوئٹر پر اپنے ایک پیغام میں کہی انہوں نے بتایا کہ متحدہ عرب امارات میں سری لنکا سے نبرد آزما قومی کرکٹ ٹیم کے ایک کھلاڑی سے سٹے باز نے رابطہ کیا.
نجم سیٹھی نے مزید بتایا کہ قومی کرکٹر نے ذمہ داری کا مظاہرہ کرتے ہوئے فوری طور پر پی سی بی کو آگاہ کیا جس پر ایکشن لیتے ہوئے پاکستان کرکٹ بورڈ نے اس معاملے کو انٹرنشینل کرکٹ کونسل کے سامنے اُٹھادیا ہے.
A player was approached. As per rules he immediately reported to PCB who informed ICC. Matters are jointly in hand. No further comment.
— Najam Sethi (@najamsethi) October 21, 2017
چیئرمین پاکستان کرکٹ بورڈ نے اپنے پیغام میں شائقین کرکٹ سے اس معاملے پر مزید تبصرے سے گریز کرنے کی درخواست کرتے ہوئے کہا کہ معاملہ مکمل طور پر ہمارے ہاتھ پر ہے جسے بین الاقوامی قوانین کے مطابق نمٹا جا رہا ہے.
دوسری جانب میڈیا کے کچھ حلقوں کا کہنا ہے کہ سٹے باز نے قومی ٹیم کے کسی کھلاڑی سے نہیں بلکہ پاکستانی ٹیم کے کپتان سرفراز احمد سے 17 اکتوبر کو سری لنکا کے خلاف تیسرے ون ڈے سے قبل رابطہ کیا تھا.
ان حلقوں کا مزید کہنا ہے کہ کپتان پاکستان کرکٹ ٹیم سرفراز احمد نے سٹے باز کے رابطے کی اطلاع اینٹی کرپشن یونٹ کے سربراہ کرنل ریٹائرڈ اعظم کو فراہم کی جس کے بعد اس معاملے کو آئی سی سی کے نوٹس میں لایا گیا.
یاد رہے کہ پاکستان نیوٹرل مقام متحدہ عرب امارات میں سری لنکا کے خلاف ٹیسٹ ، ون ڈے اور ٹی ٹوئنٹی میچوں کی سیریز کھیلنے میں مشغول ہے جہاں ٹیسٹ سیریز میں پاکستان کو ناکامی کا سامنا رہا جب کہ ون ڈے سیریز میں پاکستان وائٹ واش کرنے کے لیے تیار ہے.
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
