راولپنڈی: بھارتی فوج نے لائن آف کنٹرول کی ایک بار پھر خلاف ورزی کرتے ہوئے کھوئی رٹہ سیکٹر پر بلااشتعال فائرنگ کی جس کے نتیجے میں تین خواتین سمیت پانچ افراد زخمی ہوگئے۔
پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے لائن آف کنٹرول پر ایک بار پھر فائر بندی کے معاہدے کی خلاف ورزی کرتے ہوئے کھوئی رٹہ سیکٹر پر بلااشتعال فائرنگ اور گولہ باری کی۔
ڈی جی آئی ایس پی آر کے مطابق بھارتی دراندازی کے نتیجے میں تین خواتین سمیت پانچ افراد زخمی ہوئے، پاک فوج نے روایتی کارکردگی کا مظاہرہ کرتے ہوئے دشمن کو اشتعال انگیزی کا مؤثر اور منہ توڑ جواب دیا۔ پاک فوج کی جانب سے جوابی فائرنگ کے نتیجے میں بھارت کی چیک پوسٹیں تباہ ہوئیں اور بزدل دشمن کی توپیں خاموش ہونے پر مجبور ہوگئیں۔
مزید پڑھیں: بھارت کی لائن آف کنٹرول پر فائرنگ‘ دو خواتین‘ ایک شہری زخمی
واضح رہے کہ جنگی جنون میں مبتلا بھارت مسلسل لائن آف کنٹرول پر شہری آباد کو نشانہ بنا رہا ہے جس میں اب تک متعدد افراد شہید اور کئی زخمی ہوچکے ہیں۔
یاد رہے کہ 18 جنوری کو بھارت نے ورکنگ باؤنڈری پر بلا اشتعال فائرنگ کی اور کندن پور، سیالکوٹ اور چپراڑ سیکٹرز پر شہری آبادی کو نشانہ بنایا تھا جس کے نتیجے میں 2 خواتین شہید جبکہ 5 شہری زخمی ہوگئے تھے جبکہ اس واقعے میں 3 خواتین بھی زخمی ہوئی تھیں۔
قبل ازیں 15 جنوری کو بھی بھارتی فوج نے ورکنگ باؤنڈری کی خلاف ورزی کرتے ہوئے کوٹلی سیکٹر پر مارٹر گولے فائر کیے تھے جس کے نتیجے میں 4 پاکستانی جوان شہید ہوگئے تھے۔ جس کے بعد پاک فوج کی جانب سے بھرپور جوابی کارروائی کی گئی تھی جس کے نتیجے میں 3بھارتی فوجی ہلاک اور متعدد زخمی ہوئے تھے۔
یہ بھی پڑھیں: لائن آف کنٹرول: بھارتی فوج کا جنگی جنون، 2 خواتین سمیت 3 زخمی
بعد ازاں بھارتی فوج نے ایک ہی ہفتے میں تیسری بار سیز فائر کی خلاف ورزی کرتے ہوئے نکیال سیکٹر پر بلا اشتعال فائرنگ اور گولہ باری کی تھی جس کے نتیجے میں خاتون شہید ہوگئیں تھیں۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
