اسلام آباد: سابق وزیر خارجہ خواجہ آصف کی نااہلی کے فیصلے پر پاکستان تحریک انصاف کے چیئرمین عمران خان کا کہنا ہے کہ یہ کیس کسی کی ذات نہیں پورے پاکستان کا تھا۔
تفصیلات کے مطابق اسلام آباد ہائی کورٹ کی جانب سے سابق وزیر خارجہ خواجہ آصف کو اقامہ کیس میں نااہل قرار دینے کے فیصلے کا پاکستان تحریک انصاف کے چیئرمین عمران خان نے خیر مقدم کیا ہے۔
ان کا کہنا تھا کہ فیصلے پر خوشی ہوئی ہے، یہ کیس کسی کی ذات نہیں پورے پاکستان کا تھا۔
خیال رہے کہ خواجہ آصف کی نا اہلی کے لیے درخواست تحریک انصاف کے رہنما عثمان ڈار نے دائر کی تھی۔
درخواست میں مؤقف اختیار کیا گیا تھا کہ وزیر خارجہ دبئی میں ایک پرائیویٹ کمپنی کے ملازم ہیں جہاں سے وہ ماہانہ تنخواہ بھی حاصل کرتے ہیں۔ غیر ملکی کمپنی میں ملازمت کرنے والا شخص وزیر خارجہ کے اہم منصب پر کیسے فائز رہ سکتا ہے۔
درخواست میں عثمان ڈار کا کہنا تھا کہ وزیر دفاع ہوتے ہوئے غیر ملکی کمپنی کی ملازمت مفادات کا تصادم تھا۔
عثمان ڈار کی درخواست پر سماعت کرتے ہوئے آج اسلام آبادہائیکورٹ نے خواجہ آصف کو نااہل قرار دیا جس کے بعد وہ وزیر خارجہ بھی نہیں رہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
