دبئی: متحدہ عرب امارات پولیس نے دبئی واٹر کینال میں چھلانگ لگا کر ویڈیو سوشل میڈیا پر اپ لوڈ کرنے والے تین نوجوانوں کو گرفتار کرلیا۔
عرب میڈیا کے مطابق گزشتہ روز سوشل میڈیا پر ایک ویڈیو وائرل ہوئی جس میں دو نوجوان لڑکے کرتب دکھاتے ہوئے انتہائی خطرناک طریقے سے دبئی واٹر کینال کے پل سے چھلانگ لگا رہے تھے۔
ویڈیو وائرل ہونے کے بعد دبئی پولیس حرکت میں آئی اور چھلانگ لگانے کے واقعے میں تین نوجوانوں کو حراست میں لے لیا ہے۔
دبئی پولیس کے سربراہ بریگیڈیئر جنرل عبداللہ خلیفہ المری نے ان دونوں نوجوانوں کے خلاف قانونی اقدامات کی ہدایت کی جس نے اس حرکت سے اپنی زندگی اور سلامتی کو خطرے میں ڈالا۔
ویڈیو میں دیکھا جاسکتا ہے کہ دبئی پل سے کینال میں چھلانگ لگانے والے ایک نوجوان نے امارات کا مقامی لباس زیب تن کررکھا ہے اور دوسرے نوجوان نے کالے رنگ کا شارٹ پہن رکھا ہے، ایک نوجوان نے فلمی اسٹائل میں چھلانگ لگائی اور دوسرے نے سیدھے طریقے سے ہی کینال میں کود گیا۔
دبئی پولیس چیف کا کہنا ہے کہ نوجوانوں کے والدین کو بلایا جائے گا اور انہیں سمجھایا جائے گا کہ اپنے بچوں پر کڑی نظر رکھیں وہ کس طرح کے دوستوں میں بیٹھتے ہیں اور ان کی سرگرمیوں کا بھی جائزہ لیں۔
