لندن : افریقہ سے آنے والی گرم ہواؤں سے برطانیہ میں گرمی کی شدید لہر آنے کا امکان ہے، یہ جون لندن کی تاریخ میں اب تک کا سب سے گرم جون ثابت ہوسکتا ہے۔
تفصیلات کے مطابق محکمہ موسمیات نے خبردار کیا ہے کہ کل سے برطانیہ میں گرمی کی شدید لہر شروع ہوگی جوکہ پورے مہینے جاری رہے سکتی ہے ، اس لہر میں درجہ حرارت 27 ڈگری سینٹی گریڈ تک پہنچنے کا امکان ہے، یاد رہے کہ جون میں یہاں درجہ حرارت 16 ڈگری سینٹی گریڈ کے آس پاس رہتا ہے۔
محکمہ موسمیات کی ترجمان نکولا میکسے کا کہنا ہے کہ اس ہفتے درجہ حرارت 20 ڈگری سینٹی گریڈ سے اوپر رہے گا، مشرقی سمندر کے کنارے واقع علاقے نسبتاً ٹھنڈے رہیں گے تاہم دیگر علاقوں میں موسم گرم اور مرطوب رہے گا۔
ان کا مزید کہنا تھا کہ ہفتے کے اختتام پر درجہ حرارت 23 سے 24 ڈگری تک پہنچ جائے گا اور جنوب مشرق کے علاقوں میں 27 ڈگری سینٹی گریڈ تک پہنچنے کا امکان ہے۔
ان دنوں میں آسمان بالکل صاف اور چمکدار رہے گا ، کئی ماہرین کے مطابق یہ لہر کم از کم ایک مہینے تک جاری رہے گی۔ افریقہ سے آنے والی یہ گرم لہر ملک کے تمام علاقوں میں اپنے اثرات دکھائے گی جس کے اختتام پر موسلا دھار بارش کا امکان بھی پیشِ نظر رہے گا۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
