اسلام آباد : عمران خان کے وزیراعظم بنتے ہی ایون فیلڈ ریفرنس میں سزا یافتہ سابق وزیراعظم نوازشریف اور مریم نواز کا نام ایگزیکٹ کنٹرول لسٹ (ای سی ایل) میں ڈال دیا گیا۔
تفصیلات کے مطابق وزارت داخلہ کے ذرائع کا کہنا ہے کہ نوازشریف، مریم نواز اور کیپٹن صفدر کانام ای سی ایل میں ڈال دیاگیا، ای سی ایل میں نام نیب کی درخواست پر ڈالا گیا۔
یاد رہے نیب کی جانب سے نگران حکومت کو بھی شریف خاندان کے نام ای سی ایل میں ڈالنے کے لئے خط لکھا گیا تھا، جس کے بعد نگران حکومت نے حسن ،حسین نواز اور اسحاق ڈار کے نام بلیک لسٹ میں شامل کئے۔
گزشتہ روز وزیراعظم عمران خان کی زیر صدارت ہونے والے وفاقی کابینہ کے پہلے اجلاس میں نواز شریف اور ان کی بیٹی کا نام ای سی ایل میں ڈالنے کا فیصلہ کیا گیا تھا۔
مزید پڑھیں : نوازشریف،مریم نوازکےنام ای سی ایل میں ڈالےجائیں گے، فواد چوہدری
وفاقی وزیراطلاعات نے میڈیا بریفنگ دیتے ہوئے کہا تھا کہ اسحاق ڈار،حسن اور حسین نواز ملک سے فرار اور اشتہاری ہیں، تینوں فرار افراد کو واپس لانے کے لئے اقدامات کیے جائیں گے، وزارت داخلہ کو حکم دیا گیا ہے کہ تینوں مفرور افراد کو واپس لایا جائے۔
فواد چوہدری کا کہنا تھا ایون فیلڈ کی واپسی کے لئے برطانوی حکومت سے رابطہ کیا جائے گا، ایون فیلڈ پراپرٹیز پاکستان کا اثاثہ ہیں۔
پی ٹی آئی حکومت نے نام ای سی ایل میں ڈالنے کے لئے گزشتہ روز وزارت داخلہ کو ہدایت کی تھی جبکہ وزارت داخلہ نے حسن اور حسین نواز کے ریڈ وارنٹ جاری کرنے کے لئے ایف آئی اے کو انٹرپول کودوبارہ خط لکھنے کی بھی ہدایت کی ہے۔
خیال رہے کہ سابق وزیر اعظم نواز شریف اور مریم نواز اڈیالہ جیل میں قید ہیں۔
واضح احتساب عدالت کی جانب سے 6 جولائی کو ایون فیلڈ ریفرنس میں نواشریف کو 11، مریم نواز کو 8 اور کیپٹن صفدر کو ایک سال قید کی سزا سنائی گئی تھی۔
نوازشریف اور ان کی بیٹی مریم نواز 13 جولائی کو جب لندن سے وطن واپس لوٹے تو دونوں کو لاہور ایئرپورٹ پر طیارے سے ہی گرفتار کرلیا گیا تھا۔
