دبئی: متحدہ عرب امارات میں نوکری کی غرض سے آنے والےافراد سے سیکیورٹی ڈپازٹ لینے پر غور کیا جارہا ہے ، یہ اقدام ویزہ کی خلاف ورزی کرنے والے افراد کے سبب زیرِغور ہے۔
تفصیلات کے مطابق متحدہ عرب امارات کی وفاقی اتھارتی برائے شناخت اور شہریت اس امر پر غور کررہی ہے کہ ورک اور وزٹ ویزہ کے لیے اپلائی کرنے سے پہلے سیکیورٹی ڈپازٹ کی شرط عائد کردی جائے ۔
وفاقی اتھارتی برائے شناخت اور شہریت کے قانونی مشیر ڈاکٹر یوسف الشرفی کا کہنا ہے کہ اتھارٹی ا س بات پر غور کررہی ہے کہ یہ شرط صرف نوکری کی تلاش میں آنے والوں پر عائد کی جائے یا سب پر ، ان کا کہنا تھا کہ اگر یہ شرط عائد کی جاتی ہے تو اس سے یہ امر لازمی ہوجائے گا کہ وزٹ ویزہ پر آنے والے اپنے ویزہ کی معیاد ختم ہونے کی صورت میں واپس ضرور جائیں گے۔
یاد رہے کہ یو اے ای کی حکومت وزٹ ویزہ کی خلاف ورزی کرنے والوں کے خلاف اقدامات کررہی ہیں، گزشتہ دنوں دی جانے والی ایمنسٹی اسکیم میں یہ بات سامنے آئی تھی کہ ویزہ کی خلاف ورزی زیادہ تر وہ افراد کرتے ہیں جو کہ وزٹ ویزہ یا ٹورسٹ ویزہ پر دبئی آتے ہیں۔
ڈاکٹر الشرفی نے کہا ہے کہ ایمنسٹی اسکیم ختم ہونے کے بعد اتھارٹی نوکری کی تلاش میں آنے والوں کو چھ ماہ کا ویزہ جاری کیا کرے گی تاکہ وہ ملک میں غیر قانونی قیام کی کوشش نہ کریں۔
