کراچی: ایم کیو ایم پاکستان کے رہنما فاروق ستار نے کہا ہے کہ پی ٹی آئی کے ساتھیوں نے پارٹی میں شمولیت کی دعوت دی ہے۔
ان خیالات کا اظہار انہوں نے کراچی میں میڈیا سے گفتگو کرتے ہوئے کیا، فاروق ستار نے کہا کہ پی ٹی آئی کے دوسستوں نے پی ٹی آئی میں شامل ہونے کا مشورہ دیا ہے اور مجھے پی ٹی آئی سے این اے 247 کا الیکشن لڑنے کا مشورہ دیا ہے۔
فاروق ستار نے کہا کہ کبھی پارٹی نہیں چھوڑی آج بھی نہیں چھوڑوں گا، میری 35 سال کی جدوجہد عوام کے سامنے ہے جبکہ رابطہ کمیٹی علی رضا عابدی کو جاکر منائے۔
انہوں نے کہا کہ شرجیل میمن کے معاملے پر قانونی تقاضے پورے ہونے چاہئیں، زیتون کا تیل ہی تھا تو شراب کی بوتل میں کیوں تھا، چیف جسٹس صاحب خود کہتے ہیں شراب کی بوتلیں دیکھیں۔
ایم کیو ایم پاکستان کے رہنما نے کہا کہ ہمارے خلاف جھوٹے مقدمات کی روایت رہی ہے، عدل و انصاف ہونا چاہئے ہم عدالت کا احترام کرتے ہیں، ہمارے خلاف 2 مقدمات کی سماعت تھی، جب کاغذات نامزدگی دائر کیے یہ اس وقت کے مقدمات ہیں۔
فاروق ستار نے عارف علوی کو صدر منتخب ہونے پر مبارکباد پیش کرتے ہوئے کہا کہ امید ہے عارف علوی وفاق اور صوبوں کے درمیان تعلقات بہتر بنائیں گے، عارف علوی پارٹی کے نہیں پورے ملک کے صدر بن کر کام کریں گے۔
انہوں نے کہا کہ ہم جہاں حکومت میں شامل ہوکر ملک کی تعمیر میں کردار ادا کریں وہیں ہمارے خلاف ہونے والی دھاندلی پر بھی کردار ادا کریں، عمران خان حلقے کھولنے کو تیار ہیں لہٰذا ہمیں انتخابی عمل کی ویڈیو دکھائی جائے۔
