واشنگٹن: وزیر خارجہ شاہ محمود قریشی کا دورہ امریکا طے پاگیا، وہ 22 ستمبر کو امریکی دارالحکومت واشنگٹن پہنچیں گے۔
تفصیلات کے مطابق وزیر خارجہ شاہ محمود قریشی رواں ماہ بائیس ستمبر کو واشنگٹن پہنچیں گے، اس اہم دورے میں وہ امریکی وزیر خارجہ مائیک پومپیو سے ملاقات کریں گے۔
سفارتی ذرائع کا کہنا ہے کہ اس اہم دورے میں پاکستانی وزیر خارجہ اپنے امریکی ہم منصب مائیک پومپیو سمیت دیگر اعلیٰ حکام سے بھی ملاقاتیں کریں گے۔
ذرائع کے مطابق شاہ محمود قریشی واشنگٹن میں اہم ملاقاتوں کے بعد 24 ستمبر کو نیویارک پہنچیں گے۔
سفارتی ذرائع کا مزید کہنا تھا کہ بعد ازاں وزیر خارجہ 28 ستمبر کو اقوام متحدہ کی جنرل اسمبلی سےخطاب کریں گے، نیو یارک میں شاہ محمود قریشی کی عالمی رہنماؤں سے ملاقاتوں کا اہتمام کیا جارہا ہے۔
مائیک پومپیو کے دورہ پاکستان کا اعلامیہ: امریکا نے “ڈومور” کا روایتی مطالبہ دہرا دیا
خیال رہے کہ گذشتہ ہفتے امریکی وزیر خارجہ مائیک پومپیو نے پاکستان کا دورہ کیا تھا، اس دوران وزیر اعظم عمران خان اور آرمی چیف جنرل قمر جاوید باجوہ سے بھی ملاقات ہوئی تھی۔
بعد ازاں امریکی محکمہ خارجہ نے مائیک پومپیو کے دورہ پاکستان کا اعلامیہ جاری کرتے ہوئے پاکستان سے پھر ڈومور کا مطالبہ کیا تھا۔
واضح رہے کہ اعلامیے میں امریکا نے پاکستان سے ڈومور کا روایتی مطالبہ دہرا تھا، امریکی وزیر خارجہ نے پاکستان پر افغانستان میں امن کے لیے کردار ادا کرنے اور دہشت گردوں، شدت پسندوں کے خلاف فیصلہ کن اقدامات کرنے پر زور دیا تھا۔
