راولپنڈی: ڈی جی آئی ایس پی آر میجر جنرل آصف غور نے مسلم لیگ ن کے رہنما رانا مشہود کے بیان پر کہا ہے کہ ان کا بیان بے بنیاد اور افسوسناک ہے۔
پاک فوج کے ترجمان نے سماجی رابطے کی ویب سائٹ ٹویٹر پر رانا مشہود کے بیان پر ردعمل دیتے ہوئے کہا کہ ان کا بیان بے بنیاد اور افسوسناک ہے، ایسے غیر ذمہ دارانہ بیانات سے ملکی استحکام کو نقصان پہنچتا ہے۔
Attribution of an obvious vested statement by Rana Mashhood is baseless and regrettable. Such irresponsible expressions are detrimental to stability in the country.
— Maj Gen Asif Ghafoor (@OfficialDGISPR) October 2, 2018
واضح رہے کہ وزیر اطلاعات فواد چوہدری نے کہا کہ تھا کہ رانا مشہود کے بیان کو زیادہ اہمیت نہ دی جائے، مسلم لیگ ن کے رہنما کو کیا پتہ کہ مذاکرات کیا ہوتے ہیں، رانا مشہود سے تھانے داروں، پٹواریوں کی باتیں پوچھیں۔
تحریک انصاف کے رہنما فیاض الحسن چوہان کا کہنا تھا کہ شریف برادران خام خیالی میں نہ رہیں، پنجاب میں اب ان کی حکومت نہیں آنے والی ہے۔
خیال رہے کہ مسلم لیگ ن کے رہنما رانا مشہود نے کہا تھا کہ دو ماہ میں پنجاب میں دوبارہ حکومت بنائیں گے، اسٹیبلشمنٹ سے ہمارے معاملات ٹھیک ہوگئے ہیں، معاملات ٹھیک کرانے میں شہباز شریف نے اہم کردار ادا کیا، اسٹیبشلمنٹ کو شہباز شریف کے وزیراعظم نہ بننے کا افسوس ہے۔
دوسری جانب شہباز شریف نے رانا مشہود کے متنازع بیان کا نوٹس لیتے ہوئے پارٹی رکنیت معطل کرتے ہوئے تین رکنی کمیٹی قائم کردی، راجہ ظفر الحق، رانا تنویر، ایاز صادق ایک ہفتے میں رپورٹ دیں گے۔
