لاہور : وزیراعظم نے منشا بم کے معاملے پر سخت نوٹس لے لیا، عمران خان نے پی ٹی آئی ایم این اے کرامت کھوکھر کو طلب کرلیا، محمودالرشید کا کہنا ہے کہ انسداد تجاوزات مہم جاری رہے گی۔
تفصیلات کے مطابق وزیر اعظم عمران خان نے تحریک انصاف کے ایم پی اے کرامت کھوکھرکو بلا کر منشا بم سے متعلق وضاحت طلب کرلی، کرامت کھوکھر ملاقات کے لیے وزیر اعلیٰ ہاؤس پہنچ گئے۔
ذرائع کے مطابق وزیر اعظم نے وزیر اعلیٰ پنجاب کو قبضہ مافیا کیخلاف سخت اقدامات کی ہدایت کی ہے، ان کا کہنا ہے کہ کرامت کھوکھر سے فوری وضاحت طلب کریں، چاہے پارٹی کا کوئی بھی رہنما ہو اس کے خلاف کارروائی کی جائے۔
دوسری جانب صوبائی وزیر برائے ہاؤسنگ و تعمیرات میاں محمودالرشید نے کہا ہے کہ منشا بم جیسے لوگ گزشتہ دس سال سابق حکومت کے ساتھ رہے لیکن کبھی سابق حکومت نے منشا بم پر ہاتھ نہیں ڈالا، سب ملے ہوئے تھے۔
محمودالرشید نے مزید کہا کہ قبضہ گروپ کی مانیٹرنگ کیلئے سیل بنارہے ہیں، انشااللہ جلد قوم کو خوشخبری ملے گی، اینٹی انکروچمنٹ مہم جاری رہے گی۔
بڑے مگرمچھوں پرہاتھ ڈال رہےہیں۔ کرامت کھوکھر نے کبھی کسی قبضہ گروپ کاساتھ نہیں دیا، انکوائری کرائی، کرامت کھوکھر کسی بھی مسئلےمیں ملوث نہیں۔
