لاہور: احتساب عدالت نے شہباز شریف کے داماد عمران علی کی جائیداد قرق کرنے کا حکم دے دیا۔ عمران علی پر پاور ڈویلپمنٹ کمپنی سے 131 ملین رشوت لینے کا الزام ہے۔
تفصیلات کے مطابق سابق وزیر اعلیٰ پنجاب شہباز شریف کے داماد عمران علی کی جائیداد قرق کرنے سے متعلق درخواست پر سماعت ہوئی۔
عمران علی پر پاور ڈویلپمنٹ کمپنی سے 131 ملین رشوت لینے کا الزام ہے۔ قومی احتساب بیورو (نیب) کا کہنا ہے کہ عمران علی کو تحقیقات کے لیے طلب کیا گیا مگر وہ پیش نہ ہوئے۔
عمران علی کے وارنٹ گرفتاری جاری کیے گئے تاہم وہ بیرون ملک فرار ہیں، درخواست میں استدعا کی گئی کہ عمران علی کو اشتہاری قرار دیا جائے اور ان کی جائیدادیں ضبط کرنے کا حکم دیا جائے۔
احتساب عدالت نے ملزم عمران علی کی جائیداد قرقی کا حکم دے دیا۔
خیال رہے کہ رواں برس اگست میں عمران علی کو احتساب عدالت نے اشتہاری قرار دیا تھا۔
نیب پراسیکیوٹرکے مطابق عمران علی کو پنجاب پاور کمپنی اسکینڈل میں بارہا طلب کیا گیا لیکن وہ نیب کے سامنے پیش نہیں ہوئے۔
قومی احتساب بیورو عمران علی کو ملک میں واپس لانے کے لیے وزارت داخلہ کو مراسلہ بھی لکھ چکا ہے۔
بعد ازاں نیب نے عمران علی کے مبینہ فرنٹ مین اکرام نوید کی 1 ارب روپے سے زائد کی جائیداد بھی ضبط کر لی تھی۔
