واشنگٹن: امریکا میں دریائے ہڈسن کے کنارے ایک پارک میں مردہ پائی گئی دو سعودی لڑکیوں کی تصاویر جاری کردی گئی ہیں، حکام نے دعویٰ کیا تھا کہ واقعہ خود کشی کا لگتا ہے۔
تفصیلات کے مطابق امریکی شہر نیویارک سٹی کے ہیڈسن نامی دریا کے کنارے پر 2 سعودی لڑکیوں کی لاشیں ملی تھیں جن کے نام طلہ فاریہ اور روتانہ فاریہ بتائے گئے ہیں، سیکیورٹی حکام نے واقعے کوخودکشی قرار دیتے تحقیقات جاری رکھنے کا کہا تھا۔
امریکی میڈیا کا کہنا ہے کہ نیویارک میں واقع سعودی قونصل خانہ نے واقعے کی تصدیق کی تھی، نیویارک میں دریائے ہڈسن کے ساحل پر 16 سالہ طلہ فاریہ اور 22 سالہ روتانہ فاریہ دو بہنیں مردہ حالت میں ملی تھیں۔
عرب میڈیا کا کہنا تھا کہ دونوں سعودی شہریوں کی لاشوں سے متعلق ایک راہ گیر نے پولیس کو اسی روز (24اکتوبر) کو سہ پہر تین بجے اطلاع دی تھی، جنہیں کمراورپاؤں سے آپس میں ٹیپ سے باندھا گیا تھا۔
امریکی پولیس نے ابتدائی تحقیق کے بعد بتایا تھا کہ دونوں لڑکیوں کی عمریں 16 اور 22 سال ہیں، یہ دونوں نیویارک سے 250 میل دور ریاست ورجینیا کے فیئرفکس مقام پر رہائش پذیر تھیں تاہم دونوں لڑکیاں سعودی شہر کی شہری ہیں۔
دوسری جانب امریکی سیکیورٹی ادارے این وائی پی ڈی اور سعودی سفارت خانے کے حکام نے غیر ملکی میڈیا کی جانب سے شائع خبر ’مردہ حالت میں ملنے والی سعودی لڑکیوں کی والدہ کو سفارت خانے سے امریکا چھوڑنے کی کال موصول ہوئی تھی کیوں کہ ان کی بیٹیوں نے پناہ کی درخواست دی ہوئی تھی‘ کی تردید کی ہے۔
