لاہور : ڈیفنس میں سابق کرکٹر محمد آصف کی گاڑی حادثے کا شکار ہوگئی . جس کے باعث محمد آصف ، اہلیہ اور دو بیٹیاں زخمی ہوئی ، زخمیوں کو سروسز اسپتال منتقل کر دیا گیا ، جہاں ان کی حالت خطرے سے باہر ہے۔
تفصیلات کے مطابق لاہور کے علاقے ڈیفنس فیزون میں رات گئے کرکٹر محمد آصف کی گاڑی کو حادثہ پیش آیا، حادثے میں محمد آصف،اہلیہ اور دو بیٹیاں زخمی ہوئی۔
ریسکیو نے زخمیوں کو قریبی اسپتال منتقل کیا، جہاں سٹی سکین کی مشین کا اسٹاف نہ ہونے پرانہیں سروسز اسپتال منتقل کر دیا گیا، جہاں زخمیوں کے سٹی سکین کئے گئے۔
کرکٹر محمد آصف کے مطابق تیزرفتارگاڑی سے بچنے کی کوشش میں ان کی کار فٹ پاتھ پر چڑھ گئی، جس کے باعث حادثہ پیش آیا۔
ڈاکٹروں کے مطابق چاروں زخمیوں کی حالت خطرے سے باہر ہے ۔
خیال رہے 2010 میں اسپاٹ فکسنگ اسکینڈل پاکستان کے تین کرکٹرز سلمان بٹ، محمد آصف اور محمدعامر ملوث پائے گئے تھے جس پر انہیں 5 سال کے لیے ہر طرز کی کرکٹ سے دور کردیا گیا تھا، صرف اتنا ہی نہیں دھوکہ دہی کیس میں پاکستانی کھلاڑیوں کو برطانیہ میں جیل بھی کاٹنا پڑی تھی۔
کرکٹر محمد آصف سزا پوری کرنے کے بعد وہ اب واپڈا کی نمائندگی کررہے ہیں۔
یاد رہے سلمان بٹ اور محمد آصف نے بھی باضابطہ طور اپنے جرم کا اعتراف کیا اور قوم سے معافی مانگی تھی، آئی سی سی کو درخواست دینے کے بعد سلمان بٹ کی پانچ سال معطلی اور محمد آصف کی دو سال معطلی کی سزا ختم کردی گئی اور 19جون 2015 کو آئی سی سی نے اعلان کیا کہ تینوں کرکٹرز 5سال کی پابندی ختم ہونے پر انٹرنیشنل کرکٹ کھیلنے کیلیے آزاد ہوں گے۔
