ریاض: سعودی عرب میں غیرملکی انجینئرز کے پیشہ تبدیل کرنے پر پابندی عائد کردی گئی جبکہ پانچ برس سے کم تجربے والے غیرملکی انجینئرز ملازمت کے اہل نہیں ہوں گے۔
عرب میڈیا کے مطابق وزارت محنت و سماجی بہبود اور سعودی انجینئرز کونسل کے مشترکہ اجلاس کے دوران فیصلہ کیا گیا کہ سعودی عرب میں مقیم کسی غیرملکی انجینئرز کو اپنا پیشہ تبدیل کرنے کا اختیار نہیں ہوگا جبکہ 5 برس سے کم تجربے والے غیرملکی انجینئرز پر ملازمت کے دروازے بند کردئیے گئے ہیں۔
انجینئرز کونسل کے چیئرمین سعد الشہرانی نے کہا کہ تعمیراتی شعبے میں سعودائزیشن پر عمل درآمد کی خاطر انجینئرنگ کے ہر ٹھیکے دار کو 10 فیصد سعودی انجینئرز تعینات کرنے کا پابند کیا جائے گا۔
مزید پڑھیں: سعودی عرب ملازمتی پابندیاں، غیرملکیوں پر مزید 41 پیشوں کے دروازے بند
ان کا کہنا تھا کہ نجی اور سرکاری کمپنیوں کے تعاون سے انجینئرز کے لیے روزگار ورکشاپ کا بھی اہتمام کیا جائے گا جس میں اس بات کا جائزہ لیا جائے گا کہ کمپنیوں کو مختلف شعبوں میں کتنے انجینئرز کی ضرورت ہے۔
سعد الشہرانی نے کہا کہ جو لوگ سعودی عرب میں انجینئرنگ کے شعبے میں ملازمت کے خواہش مند ہیں ان کا سعودی مملکت میں آنے سے قبل ان کے آؓبائی وطن میں ہی امتحان لیا جائے گا اور اس امتحان میں پورا اترنے کے بعد ہی کوئی سعودی ادارہ یا فرم ویزہ جاری کرسکے گی۔
ان کا کہنا تھا کہ کوئی بھی غیرملکی انجینئر ڈگری حاصل کرنے کے فوراً بعد ہی سعودی عرب میں ملازمت کا اہل نہیں ہوگا، تجربے کا سرٹیفکیٹ پیش کرنا لازمی ہوگا۔
